बीड : बीड जिल्ह्याच्या परळी येथील मयत व्यापारी महादेव मुंडे खून प्रकरणाच्या जलद तपासासाठी स्थापन करण्यात आलेल्या एसआयटीकडून मोठे पाऊल उचलण्यात आले आहे. मयत महादेव मुंडे यांच्या खून प्रकरणातील महत्त्वपूर्ण माहिती देणाऱ्या नागरिकाला आता पोलिस प्रशासन रोख बक्षीस देणार आहे. या प्रकरणाची माहिती देणाऱ्याचे नाव गोपनीय ठेवण्यात येणार असल्याने, कुणाला या प्रकारणाविषयी माहिती असल्यास त्याने संपर्क साधावा, असे आवाहन एसआयटीचे प्रमुख आयपीएस पंकज कुमावत यांनी नागरिकांना आवाहन केले आहे.

मयत महादेव मुंडे खून प्रकरणाचा छडा लावण्यासाठी एसआयटीकडून आता वेगाने तपास सुरू झाले आहे. मात्र, त्यांना अजूनही काही ठोस पुरावे व माहिती अद्यापही मिळालेली नाही. त्यामुळे जनतेच्या मदतीसाठी आवाहन करताना एसआयटीने यासंदर्भात एक अधिकृत पत्रक जारी केले आहे. या पत्रकात म्हटले आहे की, या प्रकरणातील कुणालाही ठोस माहिती असल्यास त्यांनी ती तपास पथकाला तात्काळ द्यावी.

माहिती देणाऱ्याचे नाव पूर्णतः गोपनीय ठेवले जाईल आणि त्यांना बक्षीस देण्यात येईल. मयत महादेव मुंडे यांच्या हत्येला आता २१ महिने उलटून गेले आहेत. त्यामुळे गुन्हाचा छडा लावणे हे आयपीएस पंकज कुमावत यांच्यासमोर मोठे आव्हान आहे. दरम्यानच्या काळात महादेव मुंडेंच्या पत्नीनी मुख्यमंत्र्यांची भेट घेतली होती. त्यानंतर एस आयटीची स्थापना करण्यात आली आहे. एसआयटी स्थापन झाल्यापासून तपासाची चक्रे वेगाने फिरत आहेत.