MahaDBT Seeds Lottery – महाडीबीटी पोर्टलवरील लॉटरीत पात्र ठरणार्‍या शेतकर्‍यांनाच त्यांच्या जमिनीच्या प्रमाणात अनुदानावर बियाणे सोमवार, दि. 1 जूनपासून मिळणार आहे. खरीप हंगामात जिल्ह्यातील पात्र शेतकर्‍यांना अनुदानावर बियाणे वितरण सुरू करण्याचा निर्णय कृषी विभागाने घेतला आहे. या योजनेचा लाभ घेण्यासाठी कृषी विभागाने केलेल्या आवाहनाला शेतकर्‍यांनी उत्स्फूर्त प्रतिसाद दिला आहे.

यंदाच्या हंगामात बियाणांचा संभाव्य तुटवडा लक्षात घेऊन, कृषी विभागाने वितरणाचे नियोजन केले आहे. या अंतर्गत महाडीबीटी पोर्टलवर अर्ज केलेल्या शेतकर्‍यांमधून लॉटरी (सोडत) काढली जाईल. या लॉटरीत पात्र ठरलेल्या शेतकर्‍यांना प्राधान्याने बियाणांचे वितरण केले जाणार आहे. या योजनेत कमाल मर्यादा निश्चित करण्यात आली असून, सोयाबीनचे हेक्टरी 75 किलो बियाणे दिले जाईल.

यामध्ये किमान 20 गुंठे ते कमाल एक हेक्टर अशी जमिनीची मर्यादा ठरवण्यात आली आहे. ज्या शेतकर्‍यांकडे कमी शेतजमीन आहे, त्यांना त्यांच्या जमिनीच्या प्रमाणात बियाणे वितरित केले जाईल. बियाणांची टंचाई जाणवू नये आणि उपलब्ध साठ्याचा अपव्यय टाळता यावा, यासाठी कृषी विभागाने शेतकर्‍यांना बियाणे काळजीपूर्वक वापरण्याचा सल्ला दिला आहे.