Lovely University Violence : लवली प्रोफेशनल युनिव्हर्सिटी (Lovely University Violence) परिसरातील हिंसाचार प्रकरणी पोलिसांनी शुक्रवारी मोठी कारवाई केली असून, ७ विद्यार्थ्यांसह ९ जणांना अटक करण्यात आली आहे.

जालंधर रेंजचे डीआयजी नवीन सिंगला यांनी शुक्रवारी पत्रकारांना माहिती दिली की, हिंसाचार, जाळपोळ, लुटारूपणा, सार्वजनिक मालमत्तेचे नुकसान, पोलिसांच्या गाड्या जाळणे आणि राष्ट्रीय महामार्ग अडवणे यांसारख्या गंभीर गुन्ह्यांसंबंधी दोन एफआयआर (Lovely University Violence) दाखल करण्यात आले आहेत.

सीसीटीव्ही फुटेज, तांत्रिक विश्लेषण आणि सोशल मीडियावरील पुराव्यांच्या आधारे पोलिसांनी आतापर्यंत ९ जणांना अटक केली आहे, यामध्ये एका अल्पवयीन मुलाचाही समावेश आहे. अटक केलेल्यांपैकी चार जण फगवाड्यातील, दोन जम्मू-काश्मीरमधील तर दोन जण मुंबईतून पकडण्यात आले आहेत. यातील ७ जण एलपीयूचे विद्यार्थी असून २ जण बाहेरचे आहेत.

सोशल मीडिया इन्फ्लुएंसर आणि विद्यार्थी मोहम्मद फरहत यालाही या प्रकरणात आरोपी बनवण्यात आले असून, लवकरच त्याला अटक केली जाईल, असे पोलिसांनी सांगितले. फरहतने मात्र आपल्यावरील सर्व आरोप फेटाळले आहेत. २६ सप्टेंबरच्या संध्याकाळी कॅम्पसमध्ये एका विद्यार्थिनीवर कथित अत्याचार झाल्याची अफवा सोशल मीडियावर वाऱ्यासारखी पसरली.

त्यानंतर संतप्त विद्यार्थ्यांनी रात्रीच्या सुमारास जोरदार निदर्शने करत राष्ट्रीय महामार्ग जाम केला. परिस्थिती नियंत्रणात आणण्यासाठी पोलीस दलाने संयम राखत कसल्याही प्रकारच्या बळाचा वापर केला नाही, असे डीआयजींनी स्पष्ट केले. दुसऱ्या दिवशी विद्यार्थ्यांच्या मागणीनुसार अज्ञात व्यक्तीविरुद्ध बलात्काराचा गुन्हा दाखल करण्यात आला असून, या प्रकरणाच्या चौकशीसाठी विशेष तपास पथक स्थापन करण्यात आले आहे.

दरम्यान, या हिंसाचारानंतर (Lovely University Violence) विद्यापीठाने १० दिवसांसाठी वर्ग बंद ठेवले असून, मोठ्या प्रमाणावर विद्यार्थी आपापल्या घरी परतले आहेत. पटियालाच्या चितकारा विद्यापीठातील अशाच एका अफवेप्रकरणी पसरवणाऱ्या दोघांना पोलिसांनी अटक केल्याची माहितीही समोर आली आहे.