Govind Barge Suicide : एका माजी उपसरपंचाने डोक्यात गोळी झाडून आत्महत्या केल्याची धक्कादायक घटना बीडमधील गेवराई तालुक्यात घडली. या घटनेनंतर बीड जिल्हा पुन्हा एकदा हादरला आहे. आत्महत्या केलेल्या माजी उपसरपंचाचे नाव गोविंद बर्गे (वय 34) असे आहे.

त्यांचा बार्शी तालुक्यातील सासुर या गावात एका कारमध्ये मृत्यदेह आढळून आला होता. या घटनेची माहिती पोलिसांना मिळाल्यानंतर त्यांनी घटनास्थळी धाव घेतली. ड्रायव्हिंग सीटवर गोविंद बर्गे यांचा मृतदेह पोलिसांना मिळाला. त्यांनी डोक्याच्या उजव्या भागात कानशि‍लात गोळी झाडून घेतली होती. या प्रकरणात आता मोठा अँगल समोर आला आहे. या प्रकरणात एका नर्तिकेचं नाव समोर आलं आहे.

गोविंद बर्गे हे लुखामसाला गावचे माजी उपसरपंच होते. याच गावात त्यांचा प्लॉटिंगचा व्यवसाय होता. ते कला केंद्रातील पूजा गायकवाड या नर्तिकेच्या प्रेमात वेडे झाले होते. पण गेल्या काही दिवसांपासून ती त्यांच्याशी बोलत नव्हती. याच तणावातून बर्गे यांनी आत्महत्या केल्याची प्राथमिक माहिती आहे. पोलिसांकडून या प्रकरणात इतरही शक्यताही पडताळून पाहल्या जात आहेत.

पूजा गायकवाड हिच्यासोबत कशी ओळख झाली?

गोविंद बर्गे यांना कलाकेंद्रात जाण्याचा नाद होता. थापडीतांडा येथील कला केंद्रात त्यांची ओळख ही नर्तिका पूजा गायकवाड हिच्यासोबत झाली. या ओळखीतून पुढे दोघांमध्ये मैत्री आणि प्रेमसंबंध निर्माण झाले. गोविंद बर्गे हे नियमित पारगाव येथील कलाकेंद्रावर पूजा गायकवाड हिला भेटण्यासाठी जात होते. गोविंद यांच्याकडून पावणेदोन लाखांचा मोबाईल फोन, सोन्याचे दागिने तिने घेतले होते.

कालांतराने दोघांमध्ये बिनसलं अन् पूजा गायकवाड हिने गोविंद यांच्याशी अचानक बोलणे बंद केले. तिने गेवराईतील बंगला माझ्या नावावर करा आणि माझ्या भावाच्या नावावर पाच एकर शेती करा, असा हट्ट गोविंद बर्गे यांच्याकडे धरला होता. जर मागणी मान्य केली नाहीतर बलात्काराचा गुन्हा दाखल करेन, अशी धमकीही पूजाने गोविंद यांना दिल्याची माहिती आहे.

त्या दिवशी काय झालं?

या त्रासाला गोविंद बर्गे हे प्रचंड कंटाळले होते, यामुळे ते तणावता होते. त्यांनी अनेकदा पूजाला फोन केला. मात्र, ती त्यांचा फोन घेत नव्हती. सोमवारी मध्यरात्री ते पूजा गायकवाड हिचं सासुरे येथील घरी आले होते. त्यावेळी दोघांमध्ये नेमके काय झालं, याबात माहिती मिळू शकलेली नाही. मात्र, दुसऱ्याच दिवशी पूजा गायकवाडच्या घरापासून काही अंतरावर कारमध्ये गोविंद बर्गे यांचा मृतदेह मिळाला. याप्रकरणी गोविंद बर्गे यांच्या मेहुण्याने पोलिसांत तक्रार दिली आहे. त्यानुसार पोलिसांनी 21 वर्षांच्या नर्तिका पूजा गायकवाड हिच्याविरोधात गुन्हा दाखल केला असून या प्रकरणाचा पुढील तपास पोलिस करत आहेत.

हेही वाचा : Karisma Kapoor: संजय कपूरच्या संपत्तीवर वाद: करिश्मा कपूरच्या मुलांनी दिल्ली हायकोर्टाचा ठोठावला दरवाजा