नेवासा: शनिशिंगणापूर येथील बनावट ॲपच्या माध्यमातून केलेल्या करोडो रुपयाच्या घोटाळ्याची तातडीने चौकशी करा अन्यथा शिंगणापूर देवस्थान आवारात बेमुदत धरणे आंदोलन करण्याचा इशारा देण्यात आला आहे. शनैश्वर देवस्थान शनीशिंगणापूर या देवस्थानमध्ये काही कर्मचाऱ्यांनी देवस्थानच्या अधिकृत ऍपच्या ऐवजी बनावट ऍप तयार करून ऑनलाईन पूजेच्या माध्यमातून करोडो रुपयाचा भ्रष्टाचार केला आहे.

सकृतदर्शनी या ऍपचे दोन लाखाच्यावर सदस्य असून त्यांची सदस्यत्व फी प्रति व्यक्ती अठराशे लावली आहे. तसेच इतर पूजेच्या साहित्याचे वेगळीच फी लावण्यात आली आहे. अशा प्रकारे जवळ जवळ चाळीस कोटी रुपये शनीभक्तांकडून या बनावट अॅपच्या माध्यमातून जमा करण्यात आले आहे. परंतु, हा निधी देवस्थान तिजोरीत जमा न होता तो बनावट अॅपच्या माध्यमातून खाजगी कर्मचाऱ्याच्या खात्यावर जमा झाला आहे. यामुळे बनावट अॅपच्या माध्यमातून करोड रुपयांचा निधी कर्मचाऱ्यांनी हडप केला आहे.
यामुळे देवस्थानच्या उत्पन्नात मोठी घट झाली. देवस्थानची करोडोची फसवणूक करण्यात आली.

सकृत दर्शनी मोठा भ्रष्टाचार यात झालेला दिसतो. तसेच ऑनलाईन पूजेच्या नावाखाली शनीभक्तांची मोठी लूट या कर्मचाऱ्यांनी केलेली दिसून येते. सदरची रक्कम ही पन्नास कोटीच्या पुढे जात असून ही मोठी गंभीर बाब आहे. देवस्थान प्रशासनाला याबाबत विचारणा केली असता प्रशासन यावर बोलायला तयार नाही. याबाबत प्रशासनाला लेखी खुलासा देखील मागितला आहे. परंतु प्रशासन बोटचेपी भूमिका घेत आहे असे निदर्शनास आले.

त्यामुळे महाराष्ट्र प्रदेश काँग्रेसचे संभाजी माळवदे, काँग्रेसचे शहराध्यक्ष अंजुम पटेल, बसपाचे हरीश चक्रनारायण यांनी देवस्थानचे कार्यकारी अधिकारी गोरख दरंदले यांची भेट घेतली. आठ दिवसाच्या आत या सर्व प्रकरणाची चौकशी करून यात दोषींवर तातडीने गुन्हे दाखल करत कठोर कारवाई करण्याची मागणी करण्यात आली आहे. अपहार करण्यात आलेला करोडो रुपयाचा निधी तातडीने देवस्थान तिजोरीत जमा करण्याची मागणी केली. आठ दिवसाच्या आत छडा न लावल्यास देवस्थान आवारात बेमुदत धरणे व उपोषण आंदोलन करण्याचा इशारा देण्यात आला.

ॲपच्या माध्यमातून देवस्थानच्या अधिकृत तिजोरीत कमी महसूल जमा झाला व स्वतः च्या तुंबड्या भरण्याचा प्रकार राजरोसपणे झाला. असंख्य शनिभक्तांच्या भावनांशी हा खेळ खेळला गेला. देवाच्या दरबारात गौडबंगाल करणाऱ्यांवर कठोरात कारवाई झाल्याशिवाय मागे हटणार नाही

संभाजी माळवदे महाराष्ट्र प्रदेश काँग्रेस कमिटी.