नवी दिल्ली :-भारताचा या मोसमातील जगातील सर्वोत्तम लांबउडीपटू जॅस्विन ऑल्ड्रिनने स्वित्झर्लंडमधील “सीआयटीआययूएस’ मीटमध्ये 8.22 मीटर लांब उडीसह सुवर्णपदकाला गवसणी घातली. गेल्या पाच महिन्यांतील ऑल्ड्रिनचा हा सर्वोत्तम प्रयत्न होता आणि ही त्याच्या कारकिर्दीतील चौथी सर्वोत्तम कामगिरी आहे.

21 वर्षीय जॅस्विनने 2 मार्च रोजी बेल्लारी येथे राष्ट्रीय खुल्या जंपिंग मीटमध्ये 8.42 मीटर उडी मारली, जी या हंगामातील आतापर्यंतची जगातील सर्वोत्तम आहे. त्याने मे महिन्यात हवाना (क्‍युबा) येथे आठ मीटरपेक्षा जास्त दोन प्रयत्न केले होते.

जूनमध्ये भुवनेश्‍वर येथे झालेल्या राष्ट्रीय आंतर-राज्य चॅम्पियनशिपमध्ये 7.98 मीटरच्या प्रयत्नात रौप्य पदक जिंकणारा ऑल्ड्रिन आता बुडापेस्ट, हंगेरी येथे होणाऱ्या जागतिक ऍथलेटिक्‍स चॅम्पियनशिपसाठी पात्र ठरला आहे.

ही स्पर्धा ऑगस्ट 19-27 दरम्यान नियोजित आहे. फिटनेसच्या समस्येमुळे ऑल्ड्रिनने जुलैमध्ये झालेल्या आशियाई चॅम्पियनशिपमध्ये भाग घेतला नव्हता.