Project Mahadev | जागतिक फुटबॉल स्टार लिओनेल मेस्सी कोलकतानंतर आज मुंबईचा दौरा करणार आहेत. हा दौरा महाराष्ट्रातील युवकांसाठी एक ऐतिहासिक संधी घेऊन येत आहे, जिथे ते मेस्सीसोबत प्रशिक्षण कार्यक्रमात भाग घेऊन आपल्या कौशल्यांना नवी दिशा देऊ शकतील. लिओनेल मेस्सी आणि मुख्यमंत्री देवेंद्र फडणवीस यांच्या उपस्थितीत आज 14 डिसेंबर रोजी ‘प्रोजेक्ट महादेव’ या राज्यस्तरीय क्रीडा उपक्रमाचा शुभारंभ होणार आहे. मुख्यमंत्री देवेंद्र फडणवीस यांनी घोषणा केली की ही योजना विशेषतः फुटबॉलमध्ये आपली ओळख निर्माण करू इच्छिणाऱ्या युवकांसाठी आहे. मुंबईतील वानखेडे स्टेडियम येथे अधिकृतपणे या नव्या उपक्रमाचा शुभारंभ होत आहे. वानखेडे येथील सायंकाळी कार्यक्रम अंदाजे ५ वाजता सुरू होण्याची शक्यता आहे, तर प्रवेशद्वार सुमारे तीन तास आधी उघडले जातील. या कार्यक्रमाची सांगता थेट स्पॅनिश संगीताच्या सादरीकरणासह होईल, याशिवाय यात खेळ, संस्कृती आणि मनोरंजनाचा संगम पाहायला मिळेल. जागतिक स्तरावरील संधी उपलब्ध मिशन ऑलिम्पिक 2026 अंतर्गत महाराष्ट्रातून अधिकाधिक सुवर्णपदके मिळवणे आणि २०३४ पर्यंत फुटबॉल विश्वचषकासाठी पात्र ठरणे व विजेतेपदाचे लक्ष्य ठेवून ‘प्रोजेक्ट महादेव’ राबवण्यात येत आहे. या उपक्रमाअंतर्गत 13 ते 18 वयोगटातील खेळाडूंना शिस्तबद्ध प्रशिक्षण, योग्य मार्गदर्शन आणि जागतिक स्तरावरील संधी उपलब्ध करून दिल्या जाणार आहेत. विशेष प्रशिक्षण सत्रात भाग घेण्याची संधी महाराष्ट्रभरातून जिल्हास्तरीय निवड चाचण्यांमधून निवडलेले 60 गुणवंत 13 वर्षांखालील बालफुटबॉलपटू लिओनेल मेस्सी यांच्यासोबत 45 मिनिटांचे विशेष फुटबॉल प्रशिक्षण शिबिर आणि मार्गदर्शन सत्र अनुभवणार आहेत. निवडलेल्या खेळाडूंना मेस्सीसोबत विशेष प्रशिक्षण सत्रात भाग घेण्याची संधी मिळेल आणि त्यांना पाच वर्षांची शिष्यवृत्तीही प्रदान केली जाईल. या कार्यक्रमाचा उद्देश राज्यातील फुटबॉल खेळू इच्छिणाऱ्यांना जागतिक व्यासपीठाशी जोडणे आणि त्यांच्या क्षमतांना वाढवणे हा आहे. मुंबईतील दौऱ्यासह संपूर्ण प्रवासात मेस्सीसोबत त्याचे जवळचे सहकारी लुईस सुआरेझ आणि रॉड्रिगो डी पॉल असतील. या कार्यक्रमाला सचिन तेंडुलकर, भारतीय फुटबॉलपटू सुनील छेत्री, भारतीय फुटबॉल संघाचा कर्णधार राहल भेके, तसेच टायगर श्रॉफ, अजय देवगण, कार्तिक आर्यन, जॉन अब्राहम, करीना कपूर खान यांच्यासह अनेक नामांकित मान्यवर उपस्थित राहणार आहेत. हेही वाचा: एकुलता एक आधार गेला, पण कायद्याचा दिलासा; पीएमपी बस अपघातातील मृताच्या पालकांना २० लाखांची मदत
