Leopard Sighting – कौलीमळा (अवसरी खुर्द, ता. आंबेगाव) येथे मंगळवारी रात्री सुलोचना वाळके यांच्या घरा शेजारून दोन बिबटे जाताना दिसले. घराच्या पूर्वेस शंभर दीडशे मीटर अंतरावर पिंजरा लावलेला असतानाही बिबट्या त्यात कैद झाला नाही. रात्री साडेनऊ वाजता घराच्या पश्चिमेस असणाऱ्या शेतात दोन बिबटे जाताना आढळल्याचे आशुतोष वाळके यांनी सांगितले. अवसरी खुर्द परिसरातील कौली मळा येथे मंगळवारी रात्री साडेनऊच्या सुमारास सुलोचना वाळके यांच्या घराच्या नवीन घराच्या पश्चिमेस दोन बिबटे अवसरी फाटा -शिरूर रस्त्यावरून घरच्या दिशेने येताना आशुतोष वाळके यांनी रात्री पाहिले. त्यानंतर वस्तीवरील नागरिकांनी फटाके वाजवून त्यांना हुसकवण्याचा प्रयत्न केला. रात्री एक वाजून पंचावन्न मिनिटांनी जयसिंग बळवंत भोर यांच्या मक्याच्या शेतातून दोन बिबटे बाहेर येताना दिसले. बिबटे घराच्या उत्तर दिशेने येऊन रस्त्याने पूर्वेकडे गेल्याचे सीसीटीव्ही कॅमेऱ्यात दिसत आहे. डिसेंबर महिन्यापासून आतापर्यंत पाच ते सहा वेळा बिबटे अंगणात आल्याचे सीसीटीव्ही कॅमेरात दिसले आहेत. सुरुवातीला तीन बिबटे एकत्र पाहिले आहे. त्यातील एक बिबट्या १४ जानेवारी पिंजऱ्यात कैद झाला होता. त्यानंतर २२ फेब्रुवारी रोजी पुन्हा एकदा एक बिबट्या नवीन घराच्या पोर्चमध्ये आलेला सीसीटीव्ही कॅमेऱ्यात कैद झाला होता. त्यामुळे या परिसरात पिंजरा लावण्यात आला होता. परंतु मंगळवारी रात्री पुन्हा दोन बिबट्याचे दर्शन सीसीटीव्हीत दिसले. परंतु पिंजऱ्यात एक ही बिबट्या अडकला नाही. त्यामुळे भीतीचे वातावरण पसरले आहे. रस्त्यांची दुरवस्था कौली मळा येथील अनेक शेतकरी जनावरांसाठी चारा आणणे, शेतात पाणी भरणे तसेच या भागातील तरुण कामानिमित्ताने बाहेर गावी जात असतात. सकाळी पहाटे कामानिमित बाहेर पडावे लागते. तर कधी कधी उशिरा रात्री घरी परतावे लागते. अशा वेळी अचानक समोर बिबटे दिसला तर घाबरगुंडी उडते. त्यात या परिसरात रस्त्यांची खूप दुरवस्था झाली आहे. या बाबत आशुतोष वाळके आणि विपुल भोर म्हणाले की, या खराब रस्त्यांसंदर्भात ग्रामपंचायतमध्ये अनेक वेळा संपर्क साधला असता ग्रामपंचायतीने काही ही ठोस कार्यवाही केली नाही. येत्या काही दिवसात वस्तीवरील नागरिक माजी सहकार मंत्री दिलीप वळसे पाटील यांची भेट घेऊन परिस्थितीची माहिती देणार आहेत.
