प्रभात वृत्तसेवा तळेगाव ढमढेरे – निमगाव म्हाळुंगी परिसरात सात – आठ बिबट्यांनी धुमाकूळ घातला आहे. येथील शेतकरी पंढरीनाथ चव्हाण यांच्या शेतामध्ये व घराजवळ बिबट्यांचा मेंढरांसारखा कळप दिसून आला आहे. हे सर्व बिबटे एकत्रित फिरत आहेत. बिबट्यांचे वास्तव्य वाढल्याने नागरिकांमध्ये भीतीचे वातावरण निर्माण झाले आहे.पंढरीनाथ चव्हाण यांच्या शेताजवळून जाताना बुधवारी (दि. १७) रात्री हे बिबटे दिसले. त्यांनी या बिबट्यांचा व्हिडिओ काढला आणि तो समाज माध्यमावरील ग्रुपवर टाकला. गावात एका वेळेस इतके बिबटे पाहून भीतीचे वातावरण निर्माण झाले आहे. वनविभागाने त्वरित परिसराची पाहणी करून बिबट्याचा बंदोबस्त करण्यासाठी पिंजरा लावावा, अशी मागणी रावसाहेब चव्हाण व ग्रामस्थांनी केली आहे.दरम्यान, गावातील बिबट्यांचा वावर पाहता ग्रामपंचायतीतर्फे वनविभागाला पत्र व्यवहार केला असल्याचे सरपंच सचिन चव्हाण व पोलीस पाटील किरण काळे यांनी सांगितले. टाकळी भीमा येथे तळेगाव ढमढेरे रस्त्याला बाळासाहेब ढमढेरे यांच्या शेतात बुधवारी सकाळी बिबट्याचे दर्शन झाले असून, सोमनाथ चव्हाण यांच्या दुचाकीचा बिबट्याने पाठलाग केला. सोमनाथ यांनी वेगात गाडी नेल्याने ते बचावले आहेत. नागरिकांनी खबरदारी घ्यावी व बिबट्यापासून स्वतःचे संरक्षण करावे, असे आवाहन पंचायत समितीचे माजी सदस्य सुनील वडघुले व पोलीस पाटील प्रकाश करपे यांनी केले आहे. वनविभागातर्फे बिबट परिसरात सावधानतेचा इशारा दिला असून, नागरिकांची सुरक्षितता राखण्यासाठी प्रतिबंध करण्याचे आवाहन केले आहे.
