Latur Nagar Palika Nagar Panchayat। राज्यभरातील नगरपरिषद, नगरपंचायतींसाठीची मतमोजणी आज सकाळी 10 वाजल्यापासून सुरू होणार आहे. दुपारपर्यंत सर्व निकाल हाती येण्याची शक्यता आहे. जामनेर, अनगर आणि दोंडाईचा या तीन नगरपंचायतीमधील सर्व जागांवर भाजपचे उमेदवार बिनविरोध निवडून आलेत. त्यामुळे आज एकूण 287 नगरपरिषदा आणि नगरपंचायतींसाठी मतमोजणी पार पडणार आहे. केवळ महायुतीच नव्हे तर महाविकास आघाडीतील पक्षही ठिकठिकाणी एकमेकांविरुद्ध रिंगणात होते. त्यामुळे आजच्या निकालाबाबत कमालीची उत्सुकता आहे. दरम्यान, यामध्ये मराठवाड्यातील लातूर जिल्ह्यात देखील दिग्गजांची प्रतिष्ठा पणाला लागली आहे. लातूर जिल्ह्यातील एक नगरपंचायत आणि चार नगरपालिकांच्या निवडणुकीचा निकाल आज जाहीर होणार आहे. यात औसा, निलंगा, उदगीर, अहमदपूर या चार नगर परिषद आणि रेणापूर नगर पंचायतीचा समावेश आहे. या पाच ठिकाणी नगराध्यक्ष पदासाठी एकूण 32 तर नगरसेवकाच्या एकूण 128 जागांसाठी 513 असे एकूण 545 उमेदवारांच्या राजकीय भवितव्याचा फैसला आज होणार आहे. या निवडणुकीत सर्वच राजकीय पक्षांच्या नेत्यांची प्रतिष्ठा पणाला लागली आहे. Latur Nagar Palika Nagar Panchayat। यात अहमदपूरमध्ये राज्याचे सहकार मंत्री बाबासाहेब पाटील, औसामध्ये भाजप आमदार अभिमन्यू पवार उदगीर मध्ये राष्ट्रवादी काँग्रेस अजित पवार गटाचे नेते तथा माजी मंत्री आमदार संजय बनसोडे, निलंगा भाजप नेते तथा माजी मंत्री संभाजी पाटील निलंगेकर, तर रेनापूर याठिकाणी भाजप आमदार रमेश कराड या सत्ताधारी नेत्यांची प्रतिष्ठा पणाला लागली आहे. तर विरोधकांमधील काँग्रेसचे नेते तथा माजी मंत्री आमदार अमित देशमुख, काँग्रेसचे माजी आमदार धीरज देशमुख यांची प्रतिष्ठा पणाला लागली आहे
