Vaishnodevi – जम्मू-कश्मीरातील त्रिकूट पर्वतावर स्थित माता वैष्णो देवी मंदिराला जाणा-या मार्गावर मंगळवारी भूस्खलन होऊन दरड कोसळल्याने मोठी दुर्घटना घडली आहे. अर्द्धकुंवारी स्थित इंद्रप्रस्थ भोजनालयाजवळ ही दरड कोसळल्याने यात पाच भाविकांचा मृत्यू झाला आहे. तर १४ भाविक जखमी झाले आहेत. घटनास्थळी रेस्क्यू ऑपरेशन सुरु असून ढीगा-या खाली आणखी काही भाविक अडकलेले असल्याने मृतांचा आकडा वाढण्याची भीती व्यक्त केली जात आहे. जम्मू-काश्मीरातील अनेक भागात सलग तीन दिवस मुसळधार पाऊस कोसळत असल्याने त्रिकूट पर्वतात कटरा ते डोंगरावरील मंदिराकडे जाणाऱ्या वळण मार्गावर भूस्खलन झाल्याची घटना घडली आहे. यात पाच भाविकांचा मृत्यू झाला असून ते माता वैष्णोदेवीच्या दर्शनाला आले होते. येथे २४ हून अधिक घरे आणि पुल क्षतिग्रस्त झाले होते. जम्मूमध्ये सर्व जलाशय धोक्याच्या पातळीपेक्षा जास्त वाहत आहेत. त्यामुळे शहरातील अनेक सखल भागात पाणी साचून जनजीवन विस्कळीत झाले आहे. मुख्यमंत्री उमर अब्दुल्ला यांनी म्हटले आहे की जम्मू संभाग येथील काही ठिकाणची परिस्थिती बिकट झालेली आहे. आपण स्वत: स्थितीवर लक्ष ठेवण्यासाठी श्रीनगरातून येणा-या विमानाने जम्मूला जाणार आहोत. दरम्यान, जम्मू-श्रीनगर आणि किश्तवाड-डोडा राष्ट्रीय महामार्गावरील दळणवळण थांबवण्यात आले आहे. तर काही पर्वतातील मार्ग दरडी कोसळल्याने किंवा पुरामुळे मार्ग बंद झाले आहेत. पावसामुळे सुरक्षेचे पाऊल म्हणून वैष्णोदेवी यात्रा तात्पुरती थांबवण्यात आली आहे. विविध घटनात गंदोहमध्ये दोन आणि ठाठरीमध्ये एका व्यक्तीचा मृत्यू झाला आहे.
