Ladki Bahin Yojana : राज्यातील अत्यंत लोकप्रिय असलेल्या ‘मुख्यमंत्री माझी लाडकी बहीण’ योजनेअंतर्गत वर्षाच्या अखेरीस नोव्हेंबर महिन्याचा १५०० रुपयांचा हप्ता पात्र महिलांच्या खात्यात जमा झाला असला, तरी डिसेंबर आणि जानेवारी महिन्यांच्या प्रलंबित हप्त्यांबाबत अद्यापही संभ्रम कायम आहे. मागील तीन महिन्यांपासून प्रतीक्षेत असलेल्या महिलांना वर्षअखेरीस ३००० ते ४५०० रुपये एकत्रित मिळतील अशी अपेक्षा होती, मात्र प्रत्यक्षात केवळ नोव्हेंबरचा एकच हप्ता मिळाल्याने महिलांमध्ये काही प्रमाणात नाराजी पाहायला मिळत आहे. आता उर्वरित दोन महिन्यांचे पैसे नेमके कधी मिळणार, याकडे संपूर्ण राज्याचे लक्ष लागले आहे. डिसेंबर महिना संपत आला तरी केवळ नोव्हेंबरचे पैसे खात्यात आल्याने लाभार्थी महिलांमध्ये अस्वस्थता आहे. या विलंबामागे ई-केवायसीची प्रक्रिया कारणीभूत असल्याचे बोलले जात आहे. शासनाने ई-केवायसी पूर्ण करण्यासाठी ३१ डिसेंबर ही अंतिम मुदत दिली होती. ज्या महिलांची ही प्रक्रिया अपूर्ण आहे किंवा ज्यांचे आधार कार्ड बँकेशी लिंक नाही, अशा महिलांना पुढील लाभापासून मुकावे लागण्याची शक्यता निर्माण झाली आहे. त्यामुळे उर्वरित हप्ते मिळण्यापूर्वी पात्र लाभार्थींची यादी पुन्हा एकदा तपासली जाण्याची शक्यता आहे. ज्या महिलांना अद्याप खात्यात पैसे जमा झाल्याचा संदेश आलेला नाही, त्यांनी तांत्रिक कारणांमुळे किंवा बँक सर्व्हरच्या समस्येमुळे संदेश येण्यास उशीर होऊ शकतो हे लक्षात घेतले पाहिजे. अशा महिलांनी बँकेत जाऊन आपले पासबुक अपडेट करावे किंवा मोबाईल बँकिंगच्या माध्यमातून खात्यातील शिल्लक तपासावी, असे आवाहन तज्ज्ञांकडून करण्यात आले आहे. तसेच ई-केवायसी न केलेल्या महिलांचे हप्ते नवीन वर्षात कायमचे बंद होण्याचा धोका असल्याने, उर्वरित हप्त्यांचे वाटप हे पूर्णपणे केवायसीच्या यशस्वी पडताळणीवर अवलंबून असणार आहे. शासनाकडून डिसेंबर आणि जानेवारी महिन्यांच्या हप्त्यांबाबत अद्याप कोणतीही अधिकृत तारीख जाहीर करण्यात आलेली नाही. मात्र, जानेवारी महिन्याच्या पहिल्या पंधरवड्यात प्रलंबित हप्ते जमा होण्याची दाट शक्यता वर्तवली जात आहे. जोपर्यंत शासन या प्रलंबित हप्त्यांबाबत आणि मुदतवाढीबाबत स्पष्ट घोषणा करत नाही, तोपर्यंत लाभार्थी महिलांमधील ही अनिश्चितता कायम राहणार आहे. आता नवीन वर्षाच्या सुरुवातीला सरकार लाडक्या बहिणींना उर्वरित हप्त्यांची भेट देणार का, हे पाहणे महत्त्वाचे ठरेल.
