Ladki Bahin Yojana :  ऑगस्ट महिन्यात अर्ज करणाऱ्या तब्बल 52 लाख महिलांच्या खात्यात आज शनिवारी (दि. 31) जुलै आणि ऑगस्ट अशा 2 महिन्यासाठीचे एकूण 3 हजार रुपये पाठवले जाणार असल्याची माहिती मंत्री आदिती तटकरे यांनी दिली आहे. अनेक महिलांच्या खात्यावर पैसे जमा झाले आहेत. तर काहींच्या जमा होत आहेत. नागपूरच्या रेशिमबाग मैदानावर राज्य सरकारच्या महत्वाकांक्षी लाडकी बहीण योजनेच्या दुसऱ्या टप्प्याचे पैसे वितरणाचा कार्यक्रम संपन्न झाला. या कार्यक्रमाला राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार, केंद्रीय मंत्री नितीन गडकरी आणि महिला व बालकल्याण मंत्री अदिती तटकरेंसह इतर महायुतीतील प्रमुख नेत्यांची उपस्थिती होती.

1 कोटी 59 लाख लाभार्थ्यांना थेट लाभ –

17 ऑगस्ट रोजी लाडकी बहीण योजनेच्या पहिल्या टप्प्याच्या निधी वितरणात 1 कोटी 7 लाख महिलांच्या खात्यात 3 हजार रुपये पाठवले होते. म्हणजेच योजना सुरू झाल्यापासून आतापर्यंत 1 कोटी 59 लाख महिलांच्या खात्यात तीन हजार रुपये राज्य सरकारने टाकले आहेत. एखाद्या डीबीट योजनेतून 1 कोटी 59 लाख लाभार्थीना थेट लाभ त्यांच्या खात्यात देण्याची ही देशातील सर्वात मोठी योजना असल्याची माहिती यावेळी आदिती तटकरे यांनी दिली.

सावत्र भावांपासून महिलांनी सावध होण्याची गरज – मुख्यमंत्री शिंदे

तुमच्या योजनांबद्दल चूकीचा प्रचार करणाऱ्या, वेळप्रसंगी योजना बंद पाडण्यासाठी डाव रचणाऱ्या राज्यातील काही सावत्र भावांपासून महिलांनी सावध होण्याची गरज आहे. महायुतीची ताकद वाढवा. वेळप्रसंगी तुमच्या योजनांवर पाणी फेरणाऱ्या सावत्र भावांपासून सावध होऊन त्यांना जोडा दाखविण्याची गरज आहे, असे आवाहन मुख्यमंत्री एकनाथ शिंदे यांनी यावेळी केले. मुख्यमंत्री शिंदे पुढे बोलताना म्हणाले की, मी गरीबी पाहिलेली आहे, सोन्याच्या चमच्या घेऊन जन्माला आलेलो नाही.

दीड हजाराची किंमत आम्हालाच कळते, याची धग काय आहे, याची गरज आहे. हे पुढे बसलेल्या बहिणींशिवाय दुसऱ्यांना काय कळणार, पैसे आले तर त्यातून अर्थव्यवस्थेला चालना देणारी ही योजना आहे. अर्थव्यवस्था वाढवणारी व चालवणारी ही महिलाशिवाय दुसऱ्याशिवाय कोणालाही जमणार नाही. ही योजना सर्व रेकॉर्ड मोडले. ही योजना एवढी लोकप्रिय झाली की, विरोधकांच्या पायाखालची जमीन सरकली आहे.

महायुती सरकार ही योजना बंद होऊ देणार नाही – शिंदे

महायुती सरकार ही योजना बंद होऊ देणार नाही आणि ही योजना कदापी बंद होऊ शकणार नाही. आधी विरोधक म्हणत होते, खात्यात पैसे येणार नाही. आता आले तर ते म्हणत आहेत लवकर काढून घ्या, नाही तर सरकार पैसे काढून घेईल. आधीचे सरकार हप्ते घेणारे सरकार होतं, मात्र हे सरकार देणारे आहे, हे हफ्ते घेणारे नाही तर हफ्ते भरणारे सरकार असल्याचे म्हणत मुख्यमंत्री एकनाथ शिंदे यांनी विरोधकांवर घणाघात केला आहे.