मुंबई – कोरोना लॉकडाऊन उघडल्यापासून बॉलीवूडमधील एकही चित्रपट थिएटर्समध्ये तग धरू शकलेला नाही त्यामुळे साऊथ मूव्हीजचा बोलबाला पाहायला मिळाला. मात्र ऑगस्ट महिन्यात बॉक्स ऑफिसवर दर्जेदार चित्रपट रिलीज होताहेत. अॅक्शनपासून फॅमिली ड्रामापर्यंत सर्व काही ऑगस्टमध्ये पाहायला मिळणार आहे. त्यामुळे प्रेक्षकांसाठी ऑगस्ट महिना हा महामनोरंजनाचा ठरणार आहे.

आमिर खानच्या ‘लाल सिंग चड्ढा’ची प्रदीर्घ प्रतीक्षा अखेर संपली आहे. हा चित्रपट पुढच्या महिन्यात प्रदर्शित होत आहे. अद्वैत चंदन हा ‘लाल सिंग चड्ढा’चा दिग्दर्शक आहे. ट्रेलरमधील आमिरच्या कामगिरीने चाहत्यांना आकर्षित केले आणि 11 ऑगस्ट रोजी चित्रपट प्रदर्शित होत असल्याने चित्रपटाबद्दल अधिक जाणून घेण्यासाठी 11 ऑगस्टपर्यंत प्रतीक्षा करावी लागेल.

अक्षय कुमार स्टारर ‘रक्षा बंधन’ देखील ‘लाल सिंह चड्डा’सोबत रिलीज होत आहे. आनंद एल राय दिग्दर्शित हा चित्रपट सामाजिक संदेश देताना दिसणार आहे. हा चित्रपट रक्षाबंधच्या मुहूर्तावर म्हणजेच 11 ऑगस्टला प्रदर्शित होणार आहे. एकाच वेळी दोन मोठे चित्रपट प्रदर्शित झाल्याने चाहत्यांना वीकेंडला बोनस मिळणार आहे

तापसी पन्नू लवकरच अनुराग कश्यपच्या ‘दोबारा’ चित्रपटात दिसणार आहे. ‘दोबारा’ हा एक सायन्स-फिक्शन थ्रिलर चित्रपट आहे, जो 2018 मध्ये आलेल्या ‘मिराज’ या स्पॅनिश चित्रपटाचा हिंदी रिमेक आहे. या चित्रपटाची निर्मिती शोभा कपूर आणि एकता कपूर, सुनीर खेतरपाल आणि गौरव बोस (एथेना) यांनी संयुक्तपणे केली आहे. हा 19 ऑगस्टला जगभरातील सिनेमागृहात रिलीज होणार आहे.

करण जोहरच्या ‘लायगर’ या चित्रपटातून दक्षिणेकडील विजय देवरकोंडा बॉलिवूडमध्ये पदार्पण करण्यासाठी सज्ज झाला आहे. पुरी जगन्नाथ दिग्दर्शित, लिगर ही एमएमए फायटरची कथा आहे. या चित्रपटात विजयसोबत अनन्या पांडे मुख्य अभिनेत्रीच्या भूमिकेत दिसणार आहे. हा चित्रपट 25 ऑगस्टला 5 वेगवेगळ्या भाषांमध्ये रिलीज होणार आहे. या चित्रपटात माईक टायसनचीही महत्त्वाची भूमिका होती.

आलिया भट्टचा ‘डार्लिंग्स’ हा चित्रपट प्रचंड चर्चेत आहे. आपल्या दमदार अभिनयाने प्रेक्षकांची मने जिंकणारी आलिया या चित्रपटातून निर्माती म्हणून आपला नवा प्रवास सुरू करत आहे. ‘डार्लिंग्स’ नेटफ्लिक्सवर ५ ऑगस्टला प्रदर्शित होत आहे. ‘डार्लिंग्स’ हा डार्क कॉमेडी ड्रामा चित्रपट आहे. मुंबईत आपली जागा मिळवण्यासाठी संघर्ष करणाऱ्या आई-मुलीचे जीवन या चित्रपटात दाखवण्यात येणार आहे. या चित्रपटात आलिया मुख्य भूमिकेत दिसणार आहे.