Krunal Pandya Named India Captain for Hong Kong Sixes 2026 as Bhuvneshwar Kumar Withdraws : हाँगकाँग सिक्सेस २०२६ या आगामी ६ षटकांच्या थरारक स्पर्धेसाठी बीसीसीआयने भारतीय संघात अचानक मोठा फेरबदल केला आहे. अनुभवी वेगवान गोलंदाज भुवनेश्वर कुमारची न्यूझीलंड दौऱ्यावरील राष्ट्रीय संघात निवड झाल्यामुळे त्याने या स्पर्धेतून आपले नाव मागे घेतले आहे. भुवनेश्वर कुमार आधी या सात सदस्यीय भारतीय संघाचे नेतृत्व करणार होता. आता त्याच्या जागी आयपीएल स्टार आणि अष्टपैलू खेळाडू कृणाल पंड्या याला भारतीय संघाचा नवा कर्णधार घोषित करण्यात आले आहे.

न्यूझीलंड दौऱ्यामुळे भुवीची माघार; कुलवंत खेजरोलियाची संघात एन्ट्री –

भारताचा न्यूझीलंड दौरा २२ ऑक्टोबरपासून सुरू होत असून, ३० ऑक्टोबर ते १ नोव्हेंबर दरम्यान हाँगकाँग सिक्सेस स्पर्धा खेळवली जाणार आहे. या दोन्ही स्पर्धांच्या तारखा एकमेकांवर येत असल्याने भुवनेश्वरला या स्पर्धेतून बाहेर पडावे लागले. निवड समितीने त्याच्या जागी गुजरात टायटन्सचा डावखुरा वेगवान गोलंदाज कुलवंत खेजरोलिया याला सात सदस्यीय संघात संधी दिली आहे. कर्णधारपद मिळाल्यानंतर कृणाल पंड्याने सोशल मीडियावर व्हिडीओ शेअर करून या वृत्ताला दुजोरा दिला असून चाहत्यांना पाठिंबा देण्याचे आवाहन केले आहे.

२०२५ मधील पराभवाचा डाग पुसण्याचे मोठे आव्हान –

 

View this post on Instagram

 

मागील २०२५ चा मोसम भारतासाठी अत्यंत निराशाजनक ठरला होता. रॉबिन उथप्पा आणि दिनेश कार्तिकसारख्या दिग्गजांचा भरणा असूनही भारताला कुवेतसारख्या दुबळ्या संघाकडून धक्कादायक पराभव पत्करावा लागला होता. त्यानंतर नेपाळ, युएई आणि श्रीलंकेविरुद्धही पराभव झाल्याने संघ तळाला फेकला गेला, तर पाकिस्तानने विजेतेपद पटकावले होते. हा जुना पराभव मागे टाकण्यासाठी बीसीसीआयने यंदा देशांतर्गत क्रिकेट आणि आयपीएलमध्ये चमकदार कामगिरी करणाऱ्या फॉर्मात असलेल्या खेळाडूंची निवड केली आहे.

हेही वाचा – IND vs WI 5th T20I : भारत आणि वेस्ट इंडिज यांच्यातील निर्णायक पाचवा टी-२० सामना रद्द होणार? मग कोणाला मिळणार ट्रॉफी? जाणून घ्या

भारताचा सात सदस्यीय सुधारित संघ –

या स्पर्धेत खेळणारा भारताचा नवा संघ असा आहे: कृणाल पंड्या कर्णधार, नितीश राणा, राहुल त्रिपाठी, शशांक सिंग, राहुल तेवतिया, टी. नटराजन आणि कुलवंत खेजरोलिया. हे सर्व खेळाडू पहिल्यांदाच हाँगकाँग  सिक्सेसमध्ये पदार्पण करत असून विजेतेपद पटकावण्याच्या निर्धाराने मैदानात उतरतील.