Koyta Attack – पाण्याचा जार आणण्यासाठी जात असताना एका तरुणावर डोक्यात कोयत्याने वार करून जीवे मारण्याचा प्रयत्न केला. ही घटना सोमवारी (दि. १६ मार्च) रोजी रात्री आठ वाजण्याच्या सुमारास दापोडीतील गुलाबनगर परिसरात घडली. रोहीत उर्फ झुणझुण्या अशोक गुजरे (वय १९, रा. महादेव मंदिराशेजारी, दापोडी गावठाण, दापोडी) असे गुन्हा दाखल करून अटक करण्यात आलेल्या आरोपीचे नाव आहे. तुषार तुकाराम चाराकटले (वय २४, रा. सिद्धार्थ नगर, लकी होम टीव्ही शोरूम मागे, दापोडी) असे हल्ल्यात जखमी झालेल्या तरुणाचे नाव असून त्यांनी मंगळवारी (दि. १७) याबाबत दापोडी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी तुषार चाराकटले हे दुचाकीवरून पाण्याचा जार आणण्यासाठी जात चालले होते. ते दापोडीच्या गुलाबनगर येथील अल्बन चौक येथे आले असता आरोपी तिथे आला. त्याने फिर्यादी तुषार यांच्या मागून येत त्यांच्या डोक्यात धारदार कोयत्याने वार करून त्यास जिवे मारण्याचा प्रयत्न केला. या हल्ल्यात फिर्यादी गंभीर जखमी झाले. या प्रकरणाचा अधिक तपास दापोडी पोलीस करत आहेत.
