प्रभात वृत्तसेवा पुणे – भारतीय जनता पार्टीचा बालेकिल्ला असलेल्या कोथरूड, कर्वेनगर आणि वारजे येथील सहाही प्रभागांतील उमेदवारांना पक्षाकडून एबी फाॅर्म दिल्याचे सांगण्यात आले. त्यामध्ये पाच विद्यमान नगरसेवकांची उमेदवारी कापून थांबण्यास सांगितले. त्यामध्ये श्रद्धा प्रभुणे-पाठक, वृषाली चौधरी, माधुरी सहस्रबुद्धे, जयंत भावे आणि दीपक पोटे यांच्याऐवजी दुसऱ्या उमेदवाराला संधी देण्यात आली. त्यामुळे नाराजीचा सूर पसरला असून, उमेदवारी नाकारल्याचे समजताच काही उमेदवारांनी नेत्यांच्या निवासस्थानी हजेरी लावली.भारतीय जनता पार्टी उमेदवारांची अधिकृत यादी जाहीर केली नसली तरी ज्यांना उमेदवारी द्यायची त्यांना सकाळी सात वाजल्यापासून एबी फाॅर्म देण्यास सुरुवात केली. त्यानंतर उमेदवारांनीही एबी फाॅर्म मिळाल्याचे पक्ष आणि नेत्यांचे धन्यवाद करणारे मेसेज सोशल मीडियावर प्रसिद्ध केले. त्यामध्ये प्रभाग १० मध्ये श्रद्धा प्रभुणे-पाठक यांची उमेदवारी रद्द करून त्याठिकाणी रूपाली सचिन पवार-थरकुडे यांना उमेदवारी दिली. तर किरण दगडे, दिलीप वेडेपाटील आणि अल्पना वरपे या जुन्यांनाच पुन्हा संधी दिली. प्रभाग ३१ मध्ये शिवसेनेतून भाजपमध्ये प्रवेश केलेले पृथ्वीराज सुतार आणि निलेश कोंढाळकर यांना उमेदवारी दिली असून, हर्षाली माथवड आणि वासंती जाधव या दोन जुन्या उमेदवारांना पुन्हा संधी दिली. प्रभाग ३० मध्ये वृषाली चौधरी यांची उमेदवारी रद्द करून तेजश्री महेश पवळे यांना संधी दिली. तर राष्ट्रवादीतून भाजपमध्ये आलेल्या रेश्मा संतोष बराटे यांनाही पक्षाने संधी देत पुरुष गटातील राजेश बराटे आणि सुशील मेंगडे यांना पुन्हा संधी मिळाली. प्रभाग २९ मध्ये मंजुश्री खर्डेकर यांना पुन्हा संधी देत अन्य तीनही विद्यमान नगरवसेवकांची उमेदवारी रद्द करीत त्याठिकाणी पुनीत जोशी, सुनील पांडे आणि मिताली सावळेकर यांना संधी दिली. तसेच प्रभाग ११ मध्ये भाजपचे अजय मारणे यांसह दोन नवीन शर्मिला शिंदे आणि अभिजीत राऊत यांना संधी दिली असून, एका जागेवर अद्याप निर्णय झालेला नाही. तर प्रभाग ३२ मध्ये राष्ट्रवादी काॅग्रेसमधून आलेले सचिन दोडके, भारतभूषण बराटे आणि सायली वांजळे यांना भाजपने उमेदवारी दिली. तर वासुदेव भोसले यांच्या कुटुंबात एक उमेदवारी देण्यात आली आहे.
