कोल्हापूर : येत्या काही दिवसांनी नवीन वर्षाला सुरुवात होणार आहे. या निमित्ताने बरेच जण बाहेर कुठेतरी कुटुंबासोबत किंवा मित्र-मैत्रिणीसोबत शांत ठिकाणी फिरायला जाण्याचा प्लॅन करत असतात. अशावेळी लोक जास्तकरून अभयारण्यला जाण्याचा विचार करत असतात. कोल्हापूरमधील दाजीपूर अभयारण्य हे पर्यटनासाठी प्रसिद्ध आहे. तुम्हीदेखील या ठिकाणी जाण्याचा विचार करत असाल तर ही बातमी तुमच्यासाठी आहे.

दाजीपूर अभयारण्य 2 दिवस राहणार बंद
कोल्हापूर जिल्ह्यातील राधानगरी हा पर्यटनाच्या बाबतीत एक महत्त्वाचा तालुका आहे. याच तालुक्यात भारतातील सगळ्यात जुने असे दाजीपूर अभयारण्य आहे. गव्यांबरोबरच अजूनही बऱ्याच वन्यजीव आणि वृक्ष संपदेसाठी हे अभयारण्य खास प्रसिद्ध आहे. त्यामुळे या अभयारण्याला भेट देण्यासाठी बरेचसे पर्यटक येत असतात. मात्र दिनांक 31 डिसेंबर आणि 1 जानेवारी या दोन दिवशी हे अभयारण्य बंद राहणार असणार आहे.

का ठेवले जाणार बंद?
31 डिसेंबर दिवशी वर्षाअखेरचे सेलिब्रेशन त्याचबरोबर 1 जानेवारीला नववर्षाचे स्वागत यासाठी बाहेरून येऊन हुल्लडबाजी करण्याचे काही अनुचित प्रकार घडण्याची शक्यता असते. त्यामुळे वन्यजीव विभागाकडून खबरदारी म्हणून या दोन दिवसासाठी अभयारण्य बंद ठेवण्यात येणार आहे.

…अन्यथा कारवाई करणार
या काळात अभयारण्य क्षेत्रात विनापरवाना प्रवेश, मद्य पिणे, गाणी वाजवणे, प्लास्टिक कचरा करणे किंवा हुल्लडबाजी करणाऱ्या पर्यटकांवर वन्यजीव कायद्याअंतर्गत कारवाई करण्यात येणार आहे. 31 डिसेंबर ते 1 जानेवारी या काळात पर्यटकांनी येऊ नये, असे आवाहनदेखील वन्यजीव विभागाकडून करण्यात आले आहे.