What is KL Rahul Full Name and Interesting Story Behind Name : भक्कम टेक्निक, संयमी शैली आणि परिस्थितीनुसार कोणत्याही क्रमांकावर फलंदाजी करण्याचे कसब असणारा केएल राहुल (KL Rahul) हा सध्या भारतीय क्रिकेटमधील सर्वात विश्वासू फलंदाज मानला जातो. कसोटी संघाचा उपकर्णधार असलेला राहुल सलामीवीर, मधल्या फळीतील फलंदाज, फिनिशर आणि गरजेच्या वेळी यष्टीरक्षक अशा बहुआयामी भूमिका लिलया पेलतो. नुकत्याच झालेल्या श्रीलंका दौऱ्यातील पहिल्या कसोटीत त्याने क्रॅम्प्सचा त्रास होत असतानाही दुसऱ्या डावात शानदार अर्धशतक झळकावले. मात्र, मैदानावर आपल्या बॅटने तळपणाऱ्या केएल राहुलचे पूर्ण नाव आणि त्यामागचा रंजक किस्सा फारच कमी लोकांना ठाऊक आहे.

काय आहे केएल राहुलचे पूर्ण नाव? प्राध्यापक कुटुंबात झाला जन्म –

केएल राहुलचे पूर्ण नाव ‘कन्नूर लोकेश राहुल’ (Kannur Lokesh Rahul) असे आहे. त्याचा जन्म १८ एप्रिल १९९२ रोजी कर्नाटकातील मंगळुरू येथे एका सुशिक्षित कुटुंबात झाला. राहुलचे वडील के. एन. लोकेश हे मंगळुरूमधील नामांकित ‘एनआयटीके’ (NITK) मध्ये सिव्हिल इंजिनीअरिंगचे प्राध्यापक आहेत, तर त्याची आई राजेश्वरी या मंगळुरू विद्यापीठाच्या पदवी महाविद्यालयात सहयोगी प्राध्यापक म्हणून कार्यरत आहेत. घरात शैक्षणिक वातावरण असूनही राहुलने खेळात आपले भवितव्य घडवण्याचा निर्णय घेतला.

सुनील गावस्करांचे चाहते अन् वडिलांचा मोठा गैरसमज –

KL Rahul set the tone in Galle. 🔥🇮🇳

Now, it’s time for the Colombo chapter. 👀

Watch #SLvIND 2nd test from Aug 23, 10 AM, LIVE on #SonyLIV & #SonySportsNetwork 📺📲 pic.twitter.com/WhdCGRtzz7

— Sony LIV (@SonyLIV) August 22, 2026

राहुलच्या नावामागे क्रिकेटशी जोडलेला एक अत्यंत रंजक किस्सा आहे. राहुलचे वडील भारताचे महान फलंदाज सुनील गावस्कर (Sunil Gavaskar) यांचे प्रचंड मोठे चाहते होते. त्यामुळे आपल्या मुलाचे नाव गावस्करांच्या मुलाच्या नावावर ठेवण्याची त्यांची तीव्र इच्छा होती. मात्र, गावस्करांच्या मुलाचे नाव ‘रोहन’ असताना, त्यांनी चुकून ते ‘राहुल’ असल्याचा गैरसमज करून घेतला आणि त्यातूनच मुलाचे नाव ‘राहुल’ ठेवले गेले. पुढे जाऊन महान फलंदाज राहुल द्रविडला आपला आदर्श मानणाऱ्या राहुलचे द्रविड यांच्याशीही अतिशय घट्ट नाते निर्माण झाले.

हेही वाचा – Medhavi Bidhuri Viral : कोण आहे मेधवी बिधुरी? विकेट्स घेताच अनोख्या ‘६-७’ सेलिब्रेशनमुळे रातोरात बनलीय ‘नॅशनल क्रश’, पाहा VIDEO

कर्नाटककडून त्रिशतक ठोकणारा एकमेव फलंदाज –

शालेय स्तरावर व्हॉलीबॉल, हॉकी आणि फुटबॉल खेळणाऱ्या राहुलने वयाच्या ११व्या वर्षी क्रिकेटला प्राधान्य दिले. वयाच्या १७व्या वर्षी बंगळुरूला स्थलांतरित झाल्यानंतर त्याने कर्नाटकच्या सर्व वयोगटांतील संघांचे प्रतिनिधित्व केले. २०१० मध्ये प्रथम श्रेणी क्रिकेटमध्ये पदार्पण करणाऱ्या राहुलच्या नावावर एक ऐतिहासिक विक्रम आहे. रणजी करंडकात कर्नाटकसाठी प्रथम श्रेणी क्रिकेटमध्ये त्रिशतक झळकावणारा तो एकमेव फलंदाज आहे. २०१४-१५ च्या मोसमात त्याने उत्तर प्रदेशविरुद्ध ४४८ चेंडूंत ३३७ धावांची मॅरेथॉन खेळी साकारली होती.