KL Rahul Century : जे आजपर्यंत कोणत्याही भारतीय सलामीवीराला जमलं नाही, ते केएल राहुलने करुन दाखवत रचला नवा इतिहास
KL Rahul Century Wellington Test : केएल राहुलने न्यूझीलंडविरुद्धच्या पहिल्या कसोटीतील पहिल्या डावात २९० चेंडूचा सामना करत १३६ धावांची खेळी साकारून नवा इतिहास रचला आहे.

KL Rahul becomes first opener to score a century in the country : भारत आणि न्यूझीलंड यांच्यात वेलिंग्टनच्या बेसिन रिझर्व्ह स्टेडियमवर खेळल्या जात असलेल्या पहिल्या कसोटी सामन्याच्या तिसऱ्या दिवशी भारतीय सलामीवीर केएल राहुलने शानदार शतकी खेळी साकारली आहे. दुसऱ्या दिवसाचा खेळ संपला तेव्हा ५२ धावांवर नाबाद असलेल्या राहुलने तिसऱ्या दिवशीही आपला संयमी खेळ सुरू ठेवत दुसऱ्या सत्रात कसोटी कारकिर्दीतील १३ वे शतक पूर्ण केले. या शतकासह राहुलने भारतीय क्रिकेटच्या इतिहासात एक असा अनोखा विक्रम केला आहे, जो आजवर कोणत्याही भारतीय सलामीवीराला जमलेला नव्हता.
सर्व ‘सेना’ देशांत शतक झळकावणारा पहिलाच भारतीय सलामीवीर –
या शतकी खेळीमुळे केएल राहुल ‘सेना’ (SENA) देशांमध्ये म्हणजेच दक्षिण आफ्रिका, इंग्लंड, न्यूझीलंड आणि ऑस्ट्रेलिया या चारही देशांमध्ये सलामीवीर म्हणून शतक ठोकणारा भारताचा पहिलाच फलंदाज ठरला आहे. जागतिक क्रिकेटमध्ये या चारही देशांच्या खेळपट्ट्यांवर फलंदाजी करणे अत्यंत आव्हानात्मक मानले जाते. सलामीवीर म्हणून राहुलने यापूर्वी दक्षिण आफ्रिका, इंग्लंड आणि ऑस्ट्रेलियात शतके झळकावली होती. आता न्यूझीलंडमध्येही शतक पूर्ण करून त्याने ही दुर्मिळ कामगिरी पूर्ण केली आहे.
पाकिस्तानच्या सईद अन्वरनंतर आशियातील दुसरा फलंदाज –
Cometh a big challenge, cometh a 𝙆𝙇 𝙍𝙖𝙝𝙪𝙡 𝙨𝙥𝙚𝙘𝙞𝙖𝙡 🫡
#TeamIndia | #NZvIND | @klrahul https://t.co/PVan8Q48ty
— BCCI (@BCCI) November 21, 2026
आशियाई सलामीवीरांचा विचार केल्यास, चारही ‘सेना’ देशांमध्ये जाऊन शतक झळकावणारा केएल राहुल हा केवळ दुसराच फलंदाज ठरला आहे. यापूर्वी पाकिस्तानचा माजी दिग्गज सलामीवीर सईद अन्वरने हा पराक्रम केला होता. तसेच, सर्व फलंदाजांचा विचार करता राहुल हा सर्व चारही ‘सेना’ देशांमध्ये शतकी खेळी करणारा केवळ पाचवा भारतीय खेळाडू बनला आहे.
महान सुनील गावस्कर यांच्या विक्रमाशी केली बरोबरी –
KL Rahul brings up his 1️⃣3️⃣th Test century with effortless poise! 🫡
Watch the HERO VIDA India Tour of New Zealand, 1st Test Day 3, LIVE NOW on Sony Sports Network TV channels & Sony LIV.
#SonySportsNetwork #SonyLIV #NZvIND https://t.co/DFjoY1c4En
— Sony Sports Network (@SonySportsNetwk) November 21, 2026
भारताकडून ‘सेना’ देशांमध्ये सर्वाधिक कसोटी शतके झळकावण्याचा विक्रम सचिन तेंदुलकरच्या (१७ शतके) नावावर आहे. त्याखालोखाल विराट कोहली (१२ शतके) आणि राहुल द्रविड (१० शतके) यांचा क्रमांक लागतो. न्यूझीलंडमधील या शतकासह केएल राहुलची ‘सेना’ देशांतील शतकांची संख्या आता ८ झाली असून, त्याने दिग्गज सुनील गावस्कर यांच्या विक्रमाशी संयुक्तपणे चौथ्या स्थानावर बरोबरी साधली आहे.





