प्रभात वृत्तसेवा
चाकण – अतुल देशमुख यांनी ‘तुतारी’ सोडून ‘धनुष्यबाण’ हाती घेण्याची तयारी केल्यानंतर खेड तालुक्यातील राजकारणात नवीन गणित मांडले जाणार का, असा प्रश्न उपस्थित झाला आहे. त्यांच्या या निर्णयाचा परिणाम तालुक्यातील राष्ट्रवादी संघटनेवर आणि आगामी निवडणुकांच्या समीकरणांवर कितपत होणार, याकडे सर्वांचे लक्ष लागले आहे.खेड तालुक्यातील राजकारणात पुन्हा एकदा उलथापालथ होण्याची चिन्हे दिसू लागली आहेत.

स्थानिक पातळीवर प्रभावी मानले जाणारे अतुल देशमुख यांनी राष्ट्रवादी काँग्रेस (शरद पवार गट) सोडण्याचा निर्णय घेतला असून, ते लवकरच शिवसेना (एकनाथ शिंदे गट) मध्ये अधिकृतरित्या प्रवेश करणार असल्याची माहिती समोर आली आहे. त्यामुळे तालुक्यातील राजकीय समीकरणे नव्याने बदलण्याची शक्यता आहे. अतुल देशमुख यांनी गेल्या दशकात भारतीय जनता पक्षाच्या माध्यमातून राजकारणात सक्रिय प्रवेश केला होता.

मात्र विधानसभेच्या निवडणुकीच्या अगोदर भाजप सोडून त्यांनी राष्ट्रवादी काँग्रेस (शरद पवार गट) मध्ये प्रवेश केला. खेड मतदारसंघातील जागा आघाडीतील वाटपात उद्धव ठाकरे गटाच्या शिवसेनेला मिळाल्याने त्यांना उमेदवारी मिळू शकली नाही. तरीही, त्यांनी आमदार बाबाजी काळे यांच्या विजयात महत्त्वाची भूमिका बजावली होती. पण नंतर पक्षातील अंतर्गत गटबाजी आणि वरिष्ठांकडून झालेल्या दुर्लक्षामुळे त्यांनी तुतारीचा झेंडा खाली ठेवण्याचा निर्णय घेतल्याची चर्चा रंगली आहे.

‘धनुष्यबाण’कडे झुकलेले मनोबल..
शिवसेना (शिंदे गट) खेड तालुक्यात नव्याने संघटन उभे करण्यासाठी प्रयत्नशील असून, अतुल देशमुख यांच्या प्रवेशामुळे पक्षाला मोठा बळ मिळेल, अशी अपेक्षा व्यक्त केली जात आहे. देशमुख यांच्या प्रवेश सोहळ्याची तयारी अंतिम टप्प्यात असून, पुढील आठवड्यात खेड शहरात भव्य मेळावा होणार असल्याचे समजते.

स्थानिक राजकारणात नवे समीकरण..
देशमुख यांच्या हालचालींमुळे राष्ट्रवादी काँग्रेसच्या तालुका संघटनेला धक्का बसू शकतो. तर दुसरीकडे, शिंदे गटाने स्थानिक स्वराज्य निवडणुकांसाठी नव्या चेहर्‍यांच्या तयारीला वेग दिला आहे. देशमुख हे कार्यकर्त्यांमध्ये लोकप्रिय असून, ग्रामपातळीवरील त्यांचे मजबूत नेटवर्क शिवसेनेला तळागाळात बळकट करू शकते. देशमुख यांच्या या नव्या राजकीय वळणानंतर खेड तालुक्यातील राजकीय वर्तुळात चर्चांना उधाण आले आहे. आगामी स्थानिक स्वराज्य संस्थांच्या निवडणुकीच्या पार्श्वभूमीवर हा प्रवेश ‘गेमचेंजर’ ठरू शकतो, असे मत राजकीय जाणकार व्यक्त करत आहेत.

जुन्नरच्या शिडीचा वापर..
दरम्यान, देशमुख यांच्या शिंदे गट प्रवेशासाठी जुन्नर तालुक्यातील ‘शिडी’चा वापर झाल्याची चर्चा दबक्या आवाजात सुरू आहे. तथापि, सुरुवातीपासून शिंदे गटाशी निष्ठा ठेवणार्‍या काही पदाधिकार्‍यांमध्ये यामुळे नाराजी असल्याचे संकेत मिळत आहेत. आगामी काळात या घडामोडींमुळे खेड तालुक्याचे राजकीय चित्र किती आणि कसे बदलते, याकडे सर्वांचे लक्ष लागले आहे.