Khed News – खेड तालुक्यात सध्या ‘महाराष्ट्र विधानसभा सदस्य‘ (आमदार) असे स्टिकर लावलेल्या वाहनांचा सुळसुळाट वाढला असून, या वाहनांद्वारे वाहतूक नियमांचे सर्रास उल्लंघन केले जात असल्याचे चित्र समोर आले आहे. फॅन्सी नंबर प्लेट्स, डार्क काळ्या काचा आणि रहदारीला अडथळा ठरेल अशा पद्धतीने वाहने उभी करण्याचे प्रकार वाढले आहेत. विशेष म्हणजे आलिशान गाड्यांसह अल्टो आणि इको सारख्या छोट्या वाहनांवरही हे स्टिकर लावून काही जण दादागिरी करत असल्याच्या तक्रारी नागरिकांनी केल्या आहेत. अनेकदा सार्वजनिक ठिकाणी वाहने उभी करून वाहतुकीला अडथळा निर्माण केला जातो. याबाबत विचारणा करणाऱ्या नागरिकांशी अरेरावीची भाषा वापरली जात असल्याचेही समोर आले आहे. सामान्य नागरिकांच्या वाहनांवर आणि काळ्या काचांवर पोलीस तात्काळ ऑनलाईन दंड किंवा कारवाई करतात, मात्र आमदार स्टिकर असलेल्या वाहनांकडे सोयीस्कर दुर्लक्ष केले जात असल्याचा आरोप होत आहे. या प्रकारामुळे सामान्य जनतेत संतापाचे वातावरण असून, अशा सर्व नियमबाह्य वाहनांवर समान पद्धतीने कारवाई करण्याची मागणी जोर धरत आहे. “माझ्या कुटुंबातील कोणत्याही गाडीवर आमदार स्टिकर नाहीत. पोलिसांना याबाबत पत्र दिले आहे, असे स्टिकर लावलेल्या गाड्यांचा शोध घेऊन त्यांच्यावर योग्य ती कारवाई करावी.” – बाबाजी काळे, आमदार “याबाबत मी पोलीसांना सूचना दिल्या आहेत. त्याप्रमाणे सेझ भागात काळया काचा आणि आमदार स्टिकर असलेल्या आणि दहशद निर्माण वाहनांवर कडक कारवाई करण्यात येत आहे.” – अमोल मांडवे, उपविभागीय पोलीस अधिकारी
