Sarada Muraleedharan Viral Post | तुमच्या दिसण्यावरून तुमची योग्यता ठरत नसते असे सर्वसाधारणपणे मानले जाते. मात्र, आजही तुम्ही कितीही उच्चपदावर पोहोचला असाल तरीही रंगभेदाचा सामना करावा लागतो. काळ्या रंगावरून एखाद्याची गुणवत्ता ठरवली जाते. असेच काहीसे केरळसारख्या जवळपास 100 टक्के साक्षरता दर असलेल्या प्रगत राज्याच्या मुख्य सचिव असलेल्या शारदा मुरलीधरन यांच्यासोबत घडले आहे.

केरळच्या मुख्य सचिव असलेल्या शारदा मुरलीधरन यांच्या सावळ्या रंगावरून सोशल मीडियावर त्यांच्यावर टिप्पणी करण्यात आली होती. यावर आता शारदा यांनी जोरदार प्रत्युत्तर दिले आहे. त्यांनी सोशल मीडियावर लिहिले की, मी मागील 50 वर्षांपासून माझ्या त्वचेशी संबंधित म्हणजेच माझ्या काळ्या रंगावरून अपमानजनक गोष्टी सहन केल्या आहेत. यामुळे पूर्वाग्रहांचा सामनाही करावा लागला. पण आता यावर उत्तर देण्याची वेळ आली आहे.

शारदा मुरलीधरन यांची गेल्या वर्षी सप्टेंबरमध्ये केरळच्या मुख्य सचिवपदी नियुक्त झाली. त्याआधी त्यांचे पती व्ही वेणु हे या पदावर होते, जे 31 ऑगस्ट 2024 रोजी निवृत्त झाले. त्यांनी पदभार स्वीकारल्यानंतर, सोशल मीडियावर त्यांच्या रंगावर अनेक टिप्पण्या करण्यात आल्या. अलीकडेच एका युजरने फेसबुकवर त्यांच्या पती व त्यांच्या रंगाची तुलना करणारी कमेंट केली होती.  शारदा यांनी सोशल मीडिया पोस्टमध्ये लिहिले की, काल मुख्य सचिव म्हणून माझ्या कार्यकाळाबद्दल एक मजेशीर टिप्पणी ऐकली, ज्यात म्हटले की मी तितकीच काळी आहे जितका माझ्या पतीचा रंग गोरा आहे.

त्यांनी पोस्टमध्ये लिहिले की, लहानपणापासून त्यांना त्यांच्या रंगामुळे कमी समजले जात होते. मात्र, त्यांच्या मुलांनी काळा रंग देखील सुंदर असू शकतो हे पटवून दिले.

त्यांनी लिहिले की, “मागील 7 महिन्यांपासून सातत्याने माझ्या आधीच्या अधिकाऱ्यांसोबत तुलना केली जात आहे. आता मला याची सवय झाली आहे. काळा रंग हा काळा असतो, तो तसाच असतो. फक्त काळा रंगच नाही, तर काळा कधीही चांगले करत नाही, काळा हा अस्वस्थता, हुकूमशाही, गडद अंधाराचे प्रतिक मानले जाते. या रंगाला का बदनाम केले जाते. हा रंग एक विश्वव्यापी सत्य आहे. मानवजातीला ज्ञात असलेली सर्वात शक्तीशाली ऊर्जा आहे. तो काहीही शोषून घेऊ शकतो. काळा रंग प्रत्येक गोष्टीत आहे. ऑफिससाठीचा ड्रेस कोड, संध्याकाळच्या वातावरणातील चमक, काजळ, पावसासाठीचे आश्वासक वातावरण..

चार वर्षांची असताना मी माझ्या आईला विचारले की, ती मला तिच्या गर्भाशयात परत ठेवू शकते का आणि मला गोरी करेल का?, असेही त्यांनी या पोस्टमध्ये लिहिले. तसेच, मागील 50 वर्षांपासून हे सहन करत असल्याचे त्यांनी सांगितले. या पोस्टमध्ये त्यांनी त्यांच्या मुलांचा उल्लेख करत लिहिले की, माझी मुलं काळा रंग अभिमानाने मिरवतात. तसेच, जेथे मला कधी सुंदरता दिसली नाही, तेथेही त्यांनी सुंदर गोष्टी शोधल्या. त्यांना काळा रंग अद्भुत वाटला व मला ते पाहण्यास मदतही केली, असे शारदा यांनी लिहिले.

त्यांची ही पोस्ट सोशल मीडियावर व्हायरल होत आहे. अनेकजण यावर प्रतिक्रिया देत आहे. दरम्यान, शारदा मुरलीधरन या 1990 च्या बॅचच्या आयएएस अधिकारी आहेत. सप्टेंबर 2024 मध्ये त्या त्यांचे पती डॉ. व्ही. वेणू यांच्यानंतर केरळच्या मुख्य सचिव झाल्या.