Keerthy Suresh: दक्षिण चित्रपटसृष्टीतील राष्ट्रीय पुरस्कार विजेती अभिनेत्री कीर्ती सुरेश आपल्या मेहनतीसाठी आणि प्रोफेशनल वृत्तीसाठी ओळखली जाते. नुकताच तिने सोशल मीडियावर शेअर केलेल्या एका फोटोने चाहत्यांचं लक्ष वेधून घेतलं आहे. या फोटोसोबत कीर्तीने सांगितलं की, तिने आपल्या आगामी चित्रपटासाठी सलग ९ तास डबिंग केलं.

इंस्टाग्रामवर शेअर केलेल्या या फोटोमध्ये कीर्ती  (Keerthy Suresh) डबिंग स्टुडिओतील खुर्चीवर बसलेली दिसते. चेहऱ्यावर थकवा असला तरी काम पूर्ण झाल्याचं समाधान तिच्या हसण्यातून स्पष्ट दिसत आहे. समोर माइक लावलेला असून, दीर्घकाळ चाललेल्या डबिंग सेशननंतरचा तिचा हा क्षण आहे.

कोणत्या चित्रपटासाठी डबिंग?

फोटोसोबतच्या कॅप्शनमध्ये कीर्तीने लिहिलं, “काल ९ तासांच्या डबिंगनंतर दिवसाच्या शेवटी मी अशी दिसत होते.” मात्र, तिने नेमकं कोणत्या चित्रपटासाठी डबिंग केलं, हे सांगितलेलं नाही. त्यामुळे चाहत्यांमध्ये उत्सुकता निर्माण झाली असून, काहीजण ‘रिव्हॉल्वर रीटा’ तर काही तिच्या आगामी बॉलिवूड चित्रपटाचा अंदाज लावत आहेत.

सलग इतक्या तास डबिंग करताना आवाजात सातत्य ठेवणं हे कोणत्याही कलाकारासाठी शारीरिक आणि मानसिकदृष्ट्या आव्हानात्मक असतं. मात्र कीर्तीने हे आव्हान यशस्वीपणे पेलल्याचं दिसत आहे.

बालकलाकार ते राष्ट्रीय पुरस्कार विजेती

कीर्ती सुरेशचा प्रवास खूप प्रेरणादायी आहे. तिने लहानपणी मलयाळम चित्रपटांमधून बालकलाकार म्हणून कारकीर्द सुरू केली. २०१३ मध्ये ‘गीतांजली’ चित्रपटातून नायिकेच्या भूमिकेत पदार्पण केल्यानंतर, ‘महानती’ या चित्रपटातून तिला खरी ओळख मिळाली. दिग्गज अभिनेत्री सावित्री यांच्या भूमिकेसाठी कीर्तीला राष्ट्रीय पुरस्कार मिळाला.

अभिनयासोबत फॅशन डिझायनिंगही

अभिनयाव्यतिरिक्त कीर्ती सुरेश  (Keerthy Suresh ) ही प्रशिक्षित फॅशन डिझायनर देखील आहे. तिने लंडनमध्ये फॅशन डिझायनिंगची इंटर्नशिप पूर्ण केली असून, भविष्यात स्वतःचा फॅशन बुटीक सुरू करण्याची तिची इच्छा आहे. सध्या ती आपल्या आगामी चित्रपटांच्या तयारीत व्यस्त असून, पुन्हा एकदा प्रेक्षकांना आश्चर्यचकित करण्यासाठी सज्ज आहे.