KBC 17: लोकप्रिय टीव्ही शो ‘कोण बनेगा करोडपती’च्या १७ व्या पर्वात पुन्हा एकदा ज्ञानाचा आणि धैर्याचा सुवर्णक्षण पाहायला मिळाला. झारखंडमधील रांचीचे सुपुत्र बिप्लब बिस्वास यांनी आपल्या अफाट बुद्धिमत्तेच्या जोरावर १ कोटी रुपये जिंकून इतिहास रचला आहे. बिप्लब यांच्या आत्मविश्वासाने आणि वेगवान विचार करण्याच्या शैलीने प्रेक्षकांसह महानायक अमिताभ बच्चन यांनाही थक्क केले. बिप्लब बिस्वास सध्या छत्तीसगडमधील बीजापूर येथे सीआरपीएफ (CRPF) मध्ये इन्स्पेक्टर म्हणून तैनात आहेत. खेळाच्या सुरुवातीला त्यांनी आपल्या खडतर ड्युटीबद्दल आणि शहीद सहकाऱ्यांच्या बलिदानाबद्दल सांगताना सर्वांचे डोळे ओलावले. मात्र, खेळ सुरू झाल्यावर बिप्लब यांचा एक वेगळाच अवतार पाहायला मिळाला. त्यांनी सुरुवातीचे ५० हजार रुपये कोणत्याही लाइफलाईनचा वापर न करता अत्यंत सहजपणे जिंकले. याशिवाय, ‘सुपर संदूक’ फेरीत सर्व १० प्रश्नांची अचूक उत्तरे देऊन त्यांनी १ लाख रुपये आपल्या खात्यात जमा केले. त्यांच्या या खेळावर खुश होऊन बिग बींनी त्यांना सहकुटुंब जेवणाचे निमंत्रणही दिले. सर्वात महत्त्वाचा क्षण आला तो १ कोटी रुपयांच्या प्रश्नाचा. ‘फ्रान्समधून अमेरिकेत स्टॅच्यू ऑफ लिबर्टी वाहून नेणाऱ्या जहाजाचे नाव काय होते?’ असा कठीण प्रश्न समोर असतानाही बिप्लब अजिबात डगमगले नाहीत. त्यांनी क्षणाचाही विचार न करता ‘इसेरे’ (Isère) हे अचूक उत्तर दिले आणि करोडपती होण्याचा मान मिळवला. १ कोटी रुपयांसोबतच त्यांनी एक आलिशान कारही आपल्या नावे केली आहे. आता येत्या भागात ते ७ कोटी रुपयांच्या प्रश्नाला सामोरे जाणार असून, त्यांच्या या ऐतिहासिक कामगिरीमुळे संपूर्ण देशाचे लक्ष त्यांच्या पुढील खेळाकडे लागले आहे.
