मुंबई – अभिनेत्री अदा शर्माला ‘द केरला स्टोरी’ या चित्रपटामुळे लोकप्रियता मिळाली. या चित्रपटातील तिच्या अभिनयाचे विशेष कौतुक करण्यात आले. मात्र अदा अभिनयासह इतर अनेक गोष्टींमध्ये तरबेज आहे. अदाला असंख्य मराठी गाणी आणि कविता तोंडपाठ आहेत. याशिवाय ती डान्सही उत्तम करते. तिचे अनेक व्हिडिओ सोशल मीडियावर व्हायरल होत असतात. नुकताच तिने तिचा व्हिडिओ आणि फोटो सोशल मीडियावर शेअर केला आहे. ज्यात ती मराठमोळ्या लुकमध्ये पाहायला मिळाली.
अदाने इनस्टाग्राम शेअर केलेल्या या फोटोमध्ये तिने नऊवारी साडी नेसली होती. याशिवाय तिने नाकात नथ आणि पायात शूज घातला होता. तिने हा हटके लुक दहीहंडी निमित्त केला होता. मात्र नऊवारी साडीवर तिने शूज घालण्यामागचे कारण सांगितले आहे. तिने पोस्टमध्ये लिहिले की, “काष्टा साडी, नथ आणि शूज कसा वाटला माझा लूक? ही माझ्या आजीची साडी आहे. साडी नेसून जवळपास 1 किलोमीटर मला चिखलातून चालायला लागणार असल्याने नऊवारी साडीवर मी माझ्या मैत्रिणीचे शूज घातले होते.”
View this post on Instagram
अदाचा हा लुक पाहून अनेकांनी तिचे कौतुक केले आहे. ‘भारतीय संस्कृती या फोटोत दिसून येते’, ‘मराठी मुलगी’, अशा कमेंट्स नेटकऱ्यांनी केल्या आहेत. दरम्यान, यापूर्वी आषाढी एकादशीच्या शुभमुहूर्तावर अभिनेत्री अदा शर्माने एक व्हिडिओ शेअर केला होता. ज्यात तिला मराठी संस्कृतीबद्दल विशेष प्रेम असल्याचे दिसले. या व्हिडिओच्या माध्यमातून अदाने ‘रखुमाई रखुमाई..’ गाणं गात आषाढी एकादशीच्या चाहत्यांना शुभेच्छा दिल्या होत्या.
