Karuna Sharma on Dhananjay Munde । बीडमधील मस्साजोगचे सरपंच संतोष देशमुख हत्याप्रकरणात विरोधक आणि सत्ताधारी आमदारांच्या आरोपांना सामोरे जाणारे राज्याचे अन्न आणि नागरी पुरवठा मंत्री धनंजय मुंडे  यांच्या अडचणीत आणखी वाढ झाल्याचे दिसत आहे. कारण धनंजय मुंडे यांच्याविरोधात आता करुणा शर्मा  यांनी थेट उच्च न्यायालयाचा दरवाजा ठोठावला आहे. धनंजय मुंडे यांनी निवडणूक प्रतिज्ञापत्रात माहिती लपवल्याचा आरोप करुणा शर्मा यांनी आपल्या याचिकेत केला आहे.

धनंजय मुंडेंनी पहिल्या पत्नीच्या नावावरील मालमत्ता आणि कोर्टातील प्रलंबित प्रकरणांची माहिती लपवली असल्याचा आरोप करत करुणा शर्मा यांनी मुंबई उच्च न्यायालयातदाद मागितली आहे. त्यामुळे आधीच अडचणीत असलेले मंत्री धनंजय मुंडे यांच्या अडचणीत आणखी वाढ झाल्याचे दिसून येत आहे.

करुणा शर्मांनी याचिकेत नेमकं म्हटलंय ? Karuna Sharma on Dhananjay Munde । 
धनंजय मुंडे यांच्याविरुद्ध करुणा शर्मा यांनी मुंबई उच्च न्यायालयात धाव घेतली आहे. त्यांनी केलेल्या याचिकेत धनंजय मुंडे यांनी भ्रष्ट मार्गाने निवडणूक जिंकल्याचा त्यांनी आरोप केला आहे. धनंजय मुंडेंनी पहिल्या पत्नीच्या नावावरील मालमत्ता आणि न्यायालयातील  प्रलंबित प्रकरणांची माहिती लपवली असल्याचा आरोप देखील करुणा शर्मा यांनी केला आहे.

करुणा शर्मांचे वकील चंद्रकांत ठोंबरे यांनी दिलेल्या माहितीनुसार,”दिनांक 4 जानेवारी 2025 रोजी करुणा मुंडे यांचा फॉर्म 30-10-2024 ला चुकीच्या मार्गाने फेटाळला होता. त्याविरोधात आणि धनंजय मुंडे यांची जी निवड झालीय ती करप्ट प्रॅक्टिस आहे. त्यामुळे आम्ही करुणा मुंडे मार्फत उच्च न्यायालयात एक इलेक्शन पिटीशन दाखल केली आहे. त्यामध्ये आमचे प्रमुख मुद्दे आहेत की धनंजय मुंडे यांनी आपल्या पहिल्या पत्नी जी कायदेशीर पत्नी असून, तिचा कुठे उल्लेख केलेला नाही.

पत्नीच्या प्रॉपर्टी संदर्भात कुठलाही उल्लेख नाही

तिच्या प्रॉपर्टी संदर्भात कुठलाही उल्लेख केलेला नाही. फक्त तिच्याकडून झालेली दोन मुलं, त्याचा उल्लेख केलेला आहे. त्या दोघांमध्ये ज्या केसेस पेंडिंग आहेत, मुंबई, संभाजीनगर, पुणे आणि बऱ्याच ठिकाणी त्याचा कुठे उल्लेख केला नाही.

ही सगळी माहिती त्यांनी लपवून ठेवलेली आहे. कायद्याप्रमाणे जर निवडणूक फॉर्म भरताना कुठली माहिती लपवून ठेवली तर त्याला सहा महिन्याची शिक्षा होऊ शकते. त्याला पुराव्याची गरज नाही. कारण सगळी कागदपत्रे पुरावे आमच्याकडे आहेत” असे करुणा शर्मा यांच्या वकिलांनी म्हटले आहे. त्यामुळे आता धनंजय मुंडे यांच्याकडून या सर्व प्रकरणावर नेमकी काय प्रतिक्रिया येते हे पाहणे गरजेचे आहे.