Dhananjay Munde : राज्यात सध्या अशोक खरात प्रकरणावरून राजकारण तापले असतानाच आता आणखी एक खळबळजनक दावा समोर आला आहे. करुणा मुंडे यांनी थेट धनंजय मुंडे यांच्याबाबत गंभीर शंका व्यक्त केली आहे. करुणा मुंडे म्हणाल्या, “माझे पती धनंजय मुंडे हेही अशोक खरातच्या संपर्कात असू शकतात. कारण आमच्यावरही काही काळ्या जादूसारखे प्रकार करण्यात आले.” त्यांच्या या वक्तव्यामुळे राजकीय वर्तुळात एकच खळबळ उडाली आहे. दरम्यान, रुपाली चाकणकर यांच्यावरही त्यांनी टीका करत राजीनाम्याची मागणी केली. “त्यांनी तात्काळ राजीनामा द्यावा, अन्यथा मी आंदोलनाचा मार्ग स्वीकारेन,” असा इशाराही त्यांनी दिला. करुणा मुंडे यांनी पुढे आरोप करत म्हटले की, अशोक खरातच्या संपर्कात अनेक राजकीय नेते होते आणि त्या सर्वांची चौकशी झाली पाहिजे. तसेच “शर्मा” नावाच्या आणखी एका व्यक्तीचीही चौकशी करण्याची मागणी त्यांनी केली. या प्रकरणात आधीच विविध नेत्यांकडून आरोप-प्रत्यारोप सुरू असून सुषमा अंधारे यांनीही काही गंभीर आरोप केले आहेत. त्यामुळे या प्रकरणाची व्याप्ती वाढत असून राज्यातील राजकीय वातावरण अधिकच तापले आहे. सध्या या सर्व आरोपांमुळे संबंधित नेते अडचणीत येण्याची शक्यता व्यक्त केली जात असून, तपास यंत्रणांच्या पुढील कारवाईकडे सर्वांचे लक्ष लागले आहे. रुपाली चाकणकर यांनी राज्य महिला आयोगाच्या अध्यक्षपदाचा राजीनामा दिला आहे. अशोक खरात प्रकरणानंतर वाढलेल्या वादाच्या पार्श्वभूमीवर त्यांनी हा निर्णय घेतल्याचे समजते. या प्रकरणामुळे गेल्या काही दिवसांपासून चाकणकर यांच्यावर टीकेची झोड उठली होती आणि त्यांच्या राजीनाम्याची मागणी जोर धरत होती. दरम्यान, त्यांच्या राजीनाम्यानंतर राज्यातील राजकीय वातावरण आणखी तापण्याची शक्यता व्यक्त केली जात असून, या प्रकरणाकडे सर्वांचे लक्ष लागले आहे.
