Kartiki Yatra 2025: विठ्ठल भक्तांसाठी महत्त्वाची बातमी आहे. यावर्षी पंढरपूर येथे २ नोव्हेंबर रोजी होणाऱ्या कार्तिकी एकादशी यात्रेसाठी राज्यभरातून तब्बल १,१५० जादा एसटी बस सोडण्याचा निर्णय घेण्यात आला आहे. एसटी महामंडळाच्या पंढरपूर येथील ‘चंद्रभागा’ या यात्रा बसस्थानकावरून २८ ऑक्टोबर ते ३ नोव्हेंबर या कालावधीत जादा बस वाहतूक केली जाणार आहे. भाविकांच्या सोयीसाठी या बसस्थानकावर १७ फलाट आणि सुमारे एक हजार बस लावण्याची सुसज्ज वाहनतळ व्यवस्था करण्यात आली आहे. विशेष व्यवस्था आणि सुविधा: कर्मचारी सज्ज: प्रत्यक्ष यात्रेच्या दिवशी वाहतूक कोंडी टाळण्यासाठी चंद्रभागा बसस्थानकावर १२० पेक्षा जास्त एसटी कर्मचारी उपस्थित राहणार आहेत. दुरुस्ती पथके: वाहन दुरुस्ती व देखभालीसाठी स्वतंत्र व्यवस्था असून, शहराबाहेर बिघाडलेल्या गाड्या दुरुस्त करण्यासाठी विशेष पथके तैनात करण्यात येणार आहेत. हिरकणी कक्ष: गरोदर आणि स्तनदा महिलांसाठी बसस्थानकावर हिरकणी कक्षाची व्यवस्था करण्यात आली आहे. गाव ते पंढरपूर थेट सेवा: गट आरक्षणावर खास सवलती – भाविकांच्या सोयीसाठी एसटी महामंडळाने महत्त्वपूर्ण तयारी दर्शवली आहे. यात्रेच्या काळात ४० पेक्षा जास्त प्रवाशांनी एकत्रित मागणी केल्यास, त्यांच्या गावातून थेट पंढरपूरला जाण्यासाठी बस उपलब्ध करून दिली जाईल. या गट आरक्षणामध्ये ज्येष्ठ नागरिक व महिलांसाठी ५० टक्के आणि ७५ वर्षांवरील ज्येष्ठ नागरिकांसाठी मोफत प्रवासाची सवलत लागू राहणार आहे. त्यामुळे प्रवासाची गैरसोय टाळण्यासाठी भाविक प्रवाशांनी आपल्या गावातून गट आरक्षण करावे, असे आवाहन परिवहनमंत्री प्रताप सरनाईक यांनी केले आहे. मागील वर्षी ६ कोटी रुपयांचे उत्पन्न! मागील वर्षी कार्तिकी यात्रेत एसटीने १,०५५ जादा बस वापरून जवळजवळ ३ लाख ७२ हजार भाविक प्रवाशांची सुरक्षित ने-आण केली होती. त्याद्वारे महामंडळाला सुमारे ६ कोटी रुपये उत्पन्न मिळाले होते. यावर्षी देखील लाखो भाविकांची सेवा करण्यासाठी हजारो कर्मचारी रात्रंदिवस तत्पर असतील, अशी ग्वाही सरनाईक यांनी दिली.
