Karthik Sabesh : तमिळ चित्रपटसृष्टीवर पुन्हा एकदा दुःखाचा मोठा डोंगर कोसळला आहे. अवघ्या ३७ व्या वर्षी एका गुणी कलाकाराने जगाचा निरोप घेतल्याची धक्कादायक घटना समोर आली आहे. प्रसिद्ध अभिनेते कार्तिक सबेश (Karthik Sabesh) यांचे सोमवारी रात्री उशिरा उपचारादरम्यान निधन झाले. त्यांच्या या अचानक जाण्याने संपूर्ण दाक्षिणात्य सिनेसृष्टी आणि चाहत्यांमध्ये तीव्र शोक व्यक्त केला जात आहे.

कार्तिक सबेश (Karthik Sabesh) हे गेल्या काही काळापासून गंभीर आजाराशी झुंज देत होते. प्रकृती खालावल्यामुळे त्यांच्यावर शहरातील एका खासगी रुग्णालयात उपचार सुरू होते. मात्र, सोमवारी रात्री सुमारे ११:१५ वाजता उपचारादरम्यान त्यांची प्राणज्योत मालवली.

कार्तिक यांच्या निधनामुळे त्यांच्या कुटुंबीयांवर मोठा आघात झाला आहे. त्यांच्या पश्चात पत्नी रम्या कार्तिक आणि दोन मुली असा परिवार असून, एका क्षणात या चिमुकल्यांच्या डोक्यावरील वडिलांचे छत्र हरपले आहे.

या घटनेतील सर्वात मन हेलावून टाकणारी बाब म्हणजे, सबेश कुटुंबावर ओढवलेला दुहेरी आघात. कार्तिक हे प्रसिद्ध संगीतकार सबेश यांचे चिरंजीव, तर दिग्गज दिवंगत संगीतकार देवा यांचे भाचे होते. अवघ्या तीन दिवसांपूर्वीच संगीतकार देवा यांचे निधन झाले होते. त्या धक्क्यातून कुटुंब सावरत नाही तोच, अवघ्या ७२ तासांत कार्तिक यांच्या निधनाने सबेश कुटुंबीयांवर दुःखाचा डोंगर कोसळला.

कार्तिक सबेश (Karthik Sabesh) यांनी आपल्या सशक्त अभिनयाने तमिळ चित्रपटसृष्टीत स्वतःचे वेगळे स्थान निर्माण केले होते. ‘दम’, ‘वल्लवन’, ‘पट्टथु यानाई’ आणि ‘कुलिर १००’ यांसारख्या लोकप्रिय चित्रपटांमधील त्यांच्या भूमिका विशेष गाजल्या. सध्या त्यांचे पार्थिव अंत्यदर्शनासाठी त्यांच्या निवासस्थानी ठेवण्यात आले असून, आज दुपारी ४:३० वाजता चेन्नईतील वलसरवक्कम स्मशानभूमीत त्यांच्यावर अंत्यसंस्कार केले जातील.