Shiv Sena Hearing : शिवसेना पक्ष आणि धनुष्यबाण चिन्हाच्या वादावर सर्वोच्च न्यायालयात सुरू असलेल्या सुनावणीदरम्यान उद्धव ठाकरे गटाचे ज्येष्ठ वकील कपिल सिब्बल यांनी एकनाथ शिंदे गटाच्या भूमिकेवर जोरदार सवाल उपस्थित केला. “शिंदेंना ‘मुख्य नेता’ हे पद नेमकं कुणी दिलं?” असा थेट प्रश्न सिब्बल यांनी उपस्थित केला. (Shiv Sena Hearing)

शिवसेनेच्या १९९९ च्या पक्षघटनेत ‘मुख्य नेता’ असे कोणतेही पद अस्तित्वात नव्हते. मग एकनाथ शिंदे यांनी कोणत्या पक्षघटनेच्या आधारे स्वतःला हे पद बहाल करून घेतले? असा सवाल कपिल सिब्बल यांनी सर्वोच्च न्यायालयात केला. (Shiv Sena Hearing)

विधिमंडळातील फूट म्हणजे पक्षातील फूट नाही!

एकनाथ शिंदे यांच्या बंडानंतर शिवसेनेच्या विधिमंडळ पक्षात फूट पडली होती. मात्र, ही फूट म्हणजे राजकीय पक्षातील फूट नव्हती, असा युक्तिवाद सिब्बल यांनी केला.

राजकीय पक्षात फूट पडल्यास पक्ष आणि निवडणूक चिन्हावर अधिकार कोणाचा, याबाबत निर्णय घेण्याचा अधिकार निवडणूक आयोगाला असतो. मात्र, शिवसेनेच्या प्रकरणात विधिमंडळातील फूट हीच राजकीय पक्षातील फूट मानून निवडणूक आयोगाने निर्णय घेतला, जो चुकीचा असल्याचे सिब्बल यांनी म्हटले. (Shiv Sena Hearing0

‘पक्षघटना चुकीची होती तर चिन्ह शिंदे गटाला कसे?’

सिब्बल यांनी निवडणूक आयोगाच्या निर्णयावरही प्रश्न उपस्थित केला. त्यांच्या मते, जर उद्धव ठाकरे गटाची पक्षघटना लोकशाहीविरोधी किंवा चुकीची होती, तर त्याच पक्षघटनेच्या आधारे निर्माण झालेल्या शिंदे गटाला पक्षाचे नाव आणि धनुष्यबाण चिन्ह कसे देण्यात आले? (Shiv Sena Hearing)

“जर पक्षघटना अलोकतांत्रिक होती, तर त्याचा परिणाम पक्षाची नोंदणी रद्द होणे हा असू शकतो. त्याचा फायदा दुसऱ्या गटाला कसा मिळू शकतो?” असा सवाल त्यांनी केला. (Shiv Sena Hearing)

निवडणूक आयोग हा केवळ न्यायाधिकरणाच्या भूमिकेत असतो. एखाद्या पक्षाची घटना लोकशाहीवादी आहे की अलोकतांत्रिक, याचा अंतिम निर्णय घेण्याचा अधिकार आयोगाला नाही, असाही युक्तिवाद सिब्बल यांनी केला. (Shiv Sena Hearing)

‘ज्या घटनेतून पद मिळालं, तिलाच लोकशाहीविरोधी म्हणता?’

सुनावणीदरम्यान कपिल सिब्बल यांनी शिंदे गटाच्या भूमिकेतील कथित विसंगतीवरही बोट ठेवले. २०१८ च्या पक्षघटनेनुसार शिंदे गटातील काही पदे आणि नियुक्त्या झाल्या. मात्र, नंतर त्याच पक्षघटनेला लोकशाहीविरोधी असल्याचे आव्हान देण्यात आले, असा मुद्दा सिब्बल यांनी उपस्थित केला. (Shiv Sena Hearing)

त्याचबरोबर, “जर २०१८ ची पक्षघटना लोकशाहीविरोधी होती, तर त्या घटनेअंतर्गत झालेल्या सर्व नियुक्त्याही लोकशाहीविरोधी ठरतील,” असा युक्तिवाद करत सिब्बल यांनी शिंदे गटाची भूमिका ही स्वार्थी आणि संधीसाधू असल्याचा आरोप केला. (Shiv Sena Hearing)

शिवसेना पक्ष आणि धनुष्यबाण चिन्हावरील या कायदेशीर लढाईत पक्षघटना, ‘मुख्य नेता’ पद, विधिमंडळातील फूट आणि निवडणूक आयोगाच्या अधिकारांवरून दोन्ही बाजूंकडून जोरदार युक्तिवाद सुरू आहेत. त्यामुळे सर्वोच्च न्यायालयाच्या पुढील सुनावणीकडे महाराष्ट्रासह संपूर्ण देशाचे लक्ष लागले आहे. (Shiv Sena Hearing)