Kangana Ranaut: कन्नड चित्रपट ‘केडी: द डेविल’ मधील ‘सरके चुनरी तेरी सरके’ हे गाणं रिलीज होताच मोठ्या वादात सापडलं आहे. या गाण्यातील आशय अश्लील आणि द्विअर्थी असल्याचा आरोप करत अनेकांनी टीका केली. विशेष म्हणजे अभिनेत्री आणि खासदार कंगना रणौत यांनीही या गाण्यावर जोरदार प्रतिक्रिया दिली; मात्र त्यांनी हे गाणं बॉलिवूडचं आहे, असा गैरसमज करून टीका केल्यामुळे चर्चेला वेगळंच वळण मिळालं. या गाण्यात नोरा फतेही आणि संजय दत्त दिसत आहेत. गाणं प्रदर्शित झाल्यानंतर सोशल मीडियावर त्यावर टीकेची लाट उसळली. विरोध वाढताच हे गाणं प्लॅटफॉर्मवरून हटवण्यात आलं असून सुधारित आवृत्तीत पुन्हा रिलीज करण्याचा निर्णय घेण्यात आला आहे. दरम्यान, कंगना रणौत यांनी संसदेबाहेर माध्यमांशी बोलताना बॉलिवूडवर निशाणा साधला. त्या म्हणाल्या की, “अश्लीलता आणि स्वस्त प्रसिद्धीसाठी बॉलिवूडने सगळ्या मर्यादा ओलांडल्या आहेत. देशभरातून त्यांना विरोध होत आहे, पण त्यांना लाज वाटत नाही.” त्यांनी पुढे असंही सांगितलं की, अशा प्रकारची गाणी नवीन नाहीत, पण आता त्यावर अधिक कठोर कारवाई होण्याची गरज आहे. Sarke Chunri Teri Sarke song कंगना रणौत यांनी चित्रपट आणि गाण्यांमधील वाढत्या अश्लीलतेमुळे सामाजिक आणि सांस्कृतिक मूल्यांवर परिणाम होत असल्याची चिंता व्यक्त केली. “कुटुंबासोबत टीव्ही पाहणं कठीण झालं आहे, त्यामुळे बॉलिवूडवर नियंत्रण आणलं पाहिजे,” असं त्या म्हणाल्या. मात्र, प्रत्यक्षात हा चित्रपट कन्नड चित्रपटसृष्टीतील असून त्याचा बॉलिवूडशी थेट संबंध नाही, ही बाब त्यांच्या वक्तव्यानंतर चर्चेत आली. या वादात प्रियांक कानूनगो यांनीही उडी घेतली असून त्यांनी या गाण्यावर नोटीस देण्याबाबत संकेत दिले आहेत. तसेच गायक अरमान मलिक यांनीही गाण्याच्या दर्जावर नाराजी व्यक्त केली आहे. ‘केडी: द डेविल’ या चित्रपटाचं दिग्दर्शन प्रेम यांनी केलं आहे. या चित्रपटात ध्रुव सरजा, शिल्पा शेट्टी, वी. रविचंद्रन आणि रमेश अरविंद यांच्यासह अनेक कलाकार दिसणार आहेत. हा चित्रपट ३० एप्रिल रोजी प्रदर्शित होणार आहे. एकूणच, गाण्यातील आशयामुळे निर्माण झालेला वाद आणि त्यावर कंगना रणौत यांची चुकीच्या समजुतीतून केलेली टीका यामुळे हा विषय सध्या चांगलाच गाजत आहे.
