Kangana Ranaut: अभिनेत्री आणि भाजप खासदार कंगना रनौत  (Kangana Ranaut )पुन्हा एकदा वादाच्या भोवऱ्यात सापडल्या आहेत. गांधी कुटुंबाबाबत सोशल मीडियावर केलेल्या काही पोस्टमुळे त्यांच्या अडचणी वाढण्याची शक्यता आहे. या पोस्टमधील वक्तव्ये प्रक्षोभक असल्याचा आरोप करत हिमाचल प्रदेशातील शिमला येथे त्यांच्याविरोधात एफआयआर दाखल करण्यात आली आहे. एका निवृत्त लष्करी अधिकाऱ्याने यासंदर्भात पोलिसांकडे तक्रार केली आहे. या प्रकरणी पोलिसांनी तपास सुरू केला आहे.

नेमकं प्रकरण काय? (Kangana Ranaut)

कंगना रनौत आपल्या स्पष्टवक्तेपणामुळे आणि वादग्रस्त विधानांमुळे नेहमीच चर्चेत असतात. अलीकडेच काँग्रेस संसदीय पक्षाच्या अध्यक्षा सोनिया गांधी यांच्या पुस्तक प्रकाशनानंतर कंगना यांनी गांधी कुटुंबाबाबत सोशल मीडियावर अनेक पोस्ट केल्या होत्या. याच पोस्टवरून आता नवा वाद निर्माण झाला आहे.

शिमला येथे राहणारे निवृत्त कॅप्टन अतुल शर्मा यांनी शुक्रवारी, १३ नोव्हेंबर रोजी कंगना यांच्याविरोधात तक्रार दाखल केली. त्यांच्या तक्रारीनंतर हिमाचल प्रदेश पोलिसांनी कंगना यांच्याविरोधात एफआयआर नोंदवली. कंगना यांच्या पोस्टमुळे सामाजिक शांतता भंग होण्याची शक्यता असून, वेगवेगळ्या गटांमध्ये तेढ निर्माण होऊ शकते, असा आरोप तक्रारदाराने केला आहे.

गांधी कुटुंबातील मृत्यूंबाबत केलेल्या पोस्टवर आक्षेप  (Kangana Ranaut)

तक्रारीनुसार, १० नोव्हेंबर रोजी कंगना यांनी त्यांच्या अधिकृत सोशल मीडिया अकाउंटवरून काही पोस्ट शेअर केल्या होत्या. या पोस्टमध्ये माजी पंतप्रधान इंदिरा गांधी, त्यांचे पुत्र संजय गांधी आणि माजी पंतप्रधान राजीव गांधी यांच्या निधनासंदर्भात प्रक्षोभक स्वरूपाचे संकेत देण्यात आल्याचा आरोप करण्यात आला आहे. या पोस्टमधील मजकुरावर तक्रारदाराने आक्षेप घेतला आहे. राजकीय टीका करण्याच्या मर्यादेपलीकडे जाऊन अशा प्रकारची विधाने करण्यात आल्याचे त्यांचे म्हणणे आहे.

सोनिया गांधी यांच्यावरील टिप्पणीही चर्चेत  (Kangana Ranaut)

कंगना यांनी सोनिया गांधी यांच्याबाबत केलेल्या विधानांवरही अतुल शर्मा यांनी नाराजी व्यक्त केली आहे. तक्रारीनुसार, कंगना यांनी सोनिया गांधी यांना परदेशी नागरिक म्हणून संबोधत त्यांच्या राजकीय प्रवासाबाबत प्रश्न उपस्थित केले होते.

गांधी कुटुंबातील सदस्यांच्या मृत्यूंच्या घटनांचा आणि सोनिया गांधी यांच्या राजकीय प्रवासाचा संबंध जोडण्याचा प्रयत्न या पोस्टमध्ये करण्यात आल्याचा आरोप आहे. तसेच संजय गांधी यांच्या निधनानंतर त्यांच्या पत्नी मेनका गांधी यांना कुटुंबाच्या निवासस्थानातून बाहेर काढण्यात आल्याच्या दाव्याचाही तक्रारीत उल्लेख करण्यात आला आहे.

जाणीवपूर्वक वातावरण बिघडवण्याचा आरोप  (Kangana Ranaut) 

अतुल शर्मा यांच्या मते, या पोस्ट केवळ राजकीय टीका नव्हत्या, तर त्यामधून जाणीवपूर्वक प्रक्षोभक माहिती पसरवण्याचा प्रयत्न करण्यात आला होता. अशा पोस्टमुळे लोकांमध्ये संताप निर्माण होऊ शकतो. तसेच सार्वजनिक शांतता बिघडण्याबरोबरच वेगवेगळ्या समुदायांमध्ये वैर निर्माण होण्याची शक्यता असल्याचे त्यांनी तक्रारीत म्हटले आहे. या पोस्टमधील माहिती दिशाभूल करणारी असल्याचाही आरोप करण्यात आला आहे. त्यामुळे संबंधित प्रकरणाची सखोल चौकशी करण्याची मागणी तक्रारदाराने केली आहे.

सोनिया गांधी यांच्या नागरिकत्वावरूनही प्रश्न

या संपूर्ण वादाला सुरुवात कशी झाली, याबाबतही चर्चा सुरू आहे. याच आठवड्यात कंगना यांनी सोनिया गांधी यांच्या भारतीय नागरिकत्वाच्या वेळेबाबत प्रश्न उपस्थित केले होते. सोनिया गांधी यांचे लग्न आणि १९८३ मध्ये त्यांनी भारतीय नागरिकत्व स्वीकारल्याच्या निर्णयाचा उल्लेख करत कंगना यांनी काही आरोप केले होते. इन्स्टाग्राम स्टोरीच्या माध्यमातून त्यांनी सोनिया गांधी यांच्या राजकीय प्रवासावरही प्रश्नचिन्ह उपस्थित केले होते. त्यानंतर त्यांच्या पोस्टवरून राजकीय वर्तुळात चर्चा सुरू झाली.

दरम्यान, कंगना रनौत यांच्याविरोधात दाखल झालेल्या एफआयआरनंतर हिमाचल प्रदेश पोलिसांनी तपास सुरू केला आहे. तक्रारीत करण्यात आलेले आरोप आणि सोशल मीडिया पोस्टमधील मजकूर यांची पडताळणी केली जात आहे. या प्रकरणातील आरोप सिद्ध झालेले नसून, पोलिसांच्या तपासानंतरच पुढील चित्र स्पष्ट होणार आहे.