US Election 2024 – अमेरिकेचे माजी राष्ट्राध्यक्ष बराक ओबामा यांनी लास वेगास येथील एका कार्यक्रमात डेमोक्रॅटिक पक्षाच्या अध्यक्षपदाच्या उमेदवार कमला हॅरिस यांना पाठिंबा दिला आहे. हॅरिस या आतापर्यंतच्या सर्वात तयार उमेदवार असल्याचे त्यांनी म्हटले आहे. ओबामा म्हणाले की, अमेरिकन लोकांना नवीन पिढीचे नेते निवडून देशाचे भविष्य घडवण्याची संधी आहे जी एक चांगली, मजबूत, न्यायपूर्ण आणि अधिक समान अमेरिका बनविण्यात मदत करेल. ते म्हणाले की अमेरिका पान उलटायला तयार आहे. आम्ही अध्यक्ष कमला हॅरिस यांच्यासाठी तयार आहोत. चांगली बातमी म्हणजे हॅरिस या कामासाठी पूर्णपणे तयार आहेत.त्या एक अशा नेत्या आहेत ज्यांनी आपले संपूर्ण आयुष्य एका चॅम्पियनची गरज असलेल्या लोकांसाठी लढण्यात घालवले आहे. त्या एक अशा उमेदवार आहेत ज्यांची या देशाची उभारणी करणाऱ्या मूल्यांवर विश्वास आहे आणि राष्ट्राध्यक्ष पदाचा उमेदवार म्हणून जेवढी तयारी आवश्यक असते तेवढी सगळी तयारी कमला हॅरिस यांची आहे असेही ओबामा म्हणाले. यावेळी त्यांनी ट्रम्प यांच्यावर निशाणा साधला. ते म्हणाले की देश खोलवर विभागलेला आहे हे अमेरिकन लोकांना पटवून देण्याची ट्रम्प यांची रणनीती आहे. आपण त्यांच्या विरोधात खऱ्या अमेरिकनांना उभे राहण्याची गरज आहे. ब्रिटिश लेखक पीजी वुडहाऊस यांच्या साहित्यातील एक पात्र जीवसचा संदर्भ देऊन ओबामांनी ट्रम्प यांच्यावर निशाणा साधला. डोनाल्ड ट्रम्प यांनी आयुष्यात कधी टायर बदलला आहे असे तुम्हाला वाटते का? जर त्यांना फ्लॅट टायर मिळाले तर ते जीवसला बोलावतात आणि म्हणतात तो टायर बदला. मुद्दा असा आहे की जर तुम्ही कमला आणि टिमची निवड केली तर ते त्यांच्या समस्यांवर लक्ष केंद्रित करणार नाहीत. ते तुमच्या समस्यांवर लक्ष केंद्रित करतील. ओबामा ट्रम्प यांच्यावर हल्लाबोल करत असताना एका क्षणी ट्रम्प समर्थकांनी हुल्लडबाजी सुरू केली. त्यांनी ओबामांना चिडवायला सुरुवात केली, ज्याला ओबामांनी उत्तर दिले, गोंधळ घालू नका, जा असे ओबामांनी त्यांना सांगितले.
