बेंगळुरू : तुम्ही सामान्य व्यक्ती नाही आहात. तुम्हाला बोलण्याचा अधिकार आहे. पण अभिव्यक्ती स्वातंत्र्याच्या अधिकाराचा गैरवापर करून जनतेच्या भावना दुखावण्याचा कोणालाही अधिकार नाही. तुम्ही असाल निष्णात अभिनेते मात्र दाक्षिणात्य भाषांमध्येच वाद निर्माण करुन तुम्ही नक्की साध्य तरी काय करु पहात आहात अशा शब्दांत कन्नड भाषेवरील वादग्रस्त विधानाबद्दल तामिळनाडूचे अभिनेता-राजकारणी कमल हासन यांना बेंगळुरू उच्च न्यायालयाने फटकारले आहे.

न्यायालयाने हासन यांच्याविरोधात कडक कारवाईचा इशारा दिला आणि वादग्रस्त विधान मागे घेण्याचा सल्ला दिला. कमल हासन यांनी अलिकडेच असा दावा केला होता की, कन्नड भाषा ही तमिळ भाषेतून जन्मली आहे. या विधानानंतर कर्नाटकात वाद आणखी वाढला होता.न्यायालयाने पुढे म्हटले की, तुम्हाला हे समजून घ्यावे लागेल की, एकदा अंडी फुटली की पुन्हा त्यात सामील होणे शक्य नाही. तुम्ही हे विधान केले आहे, आता ते परत घ्या. जर तुम्ही कोणाच्या भावना दुखावल्या असतील तर तुम्ही माफी मागावी.

कमल हासन यांचा आगामी चित्रपट ठग लाइफ कर्नाटकात प्रदर्शित होणार आहे आणि त्यातून कोट्यवधींचा महसूल मिळू शकतो. न्यायालयाने म्हटले की, तुम्ही कर्नाटकातून पैसे कमवू शकता पण जर तुम्हाला कन्नड जनतेची गरज नसेल तर ही कमाई सोडून द्या. आम्ही कोणालाही जनतेच्या भावनांशी खेळू देणार नाही. तामिळनाडूच्या सत्ताधारी द्रमुक पक्षाच्या पाठिंब्याने ७० वर्षीय कमल हासन लवकरच राज्यसभेचे खासदार होण्याची शक्यता आहे. या संपूर्ण वादामुळे राजकीय वर्तुळातही चांगलीच खळबळ उडाली आहे.