नवी दिल्ली : येत्या काही महिन्यांमध्ये दिल्लीत विधानसभा निवडणुका पार पडणार आहेत. या निवडणुकीच्या अगोदरच आम आदमी पार्टीला मोठा धक्का बसला आहे. पक्षाचे नेते आणि दिल्ली सरकारमध्ये मंत्री असणाऱ्या कैलाश गेहलोत यांनी आपल्या पदाचा राजीनामा देत पक्षाची साथ सोडली. यानंतर त्यांनी भाजपमध्ये प्रवेश केला आहे. हरियाणाचे माजी मुख्यमंत्री मनोहरलाल खट्टर आणि भाजपचे प्रदेशाध्यक्ष वीरेंद्र सचदेवा यांच्या उपस्थितीत हा पक्षप्रवेश पार पडला.

‘आप’ ला मोठा धक्का
कैलाश गेहलोत हे कधीकाळी स्वत:ला केजरीवालांचा हनुमान म्हणायचे, पण आज त्यांनी भाजप प्रवेश केल्यानं आप ला मोठा धक्का बसला आहे. हा निर्णय कोणत्याही दबावाखाली घेतलेला नाही. ज्यांना कोणाला वाटतं की मी दबावात पक्ष सोडला त्यांना सांगेन की मी कधीच कुणाच्या दबावाखाली काम केलं नाही असे कैलाश गेहलोत पक्षप्रवेश करताना म्हणाले.

केजरीवाल यांच्यावर टीका
गेहलोत यांनी केजरीवाल यांच्यावर टीका करताना शीशमहल यांसारख्या वादाचाही उल्लेख केला. कधी कधी शंका वाटते की आपण स्वत:ला आम आदमी म्हणतो का? असा सवाल त्यांनी यावेळी उपस्थित केला.