तिरुअनंतपुरम : हरियाणातील ३३ वर्षीय प्रसिद्ध व्लॉगर ज्योती मल्होत्राला पाकिस्तानसाठी हेरगिरी केल्याच्या आरोपाखाली नुकतीच अटक करण्यात आली आहे. आश्चर्यकारक गोष्ट म्हणजे याच ज्योतीला काही काळापूर्वी केरळ सरकारने त्यांच्या पर्यटनाच्या प्रचारासाठी अधिकृतपणे आमंत्रित केले होते. ज्योतीच्या केरळ सहलीचा संपूर्ण खर्च राज्य सरकारने उचलला होता असा खळबळजनक खुलासा माहिती अधिकाराखाली मागवलेल्या माहितीत झाला आहे.

आरटीआयनुसार, केरळ पर्यटन विभागाच्या विशेष मोहिमेचा भाग म्हणून ज्योतीने राज्याला भेट दिली. या मोहिमेचा उद्देश सोशल मीडिया इन्फ्लुएन्सरच्या मदतीने केरळला डिजिटल जगात एक उत्तम पर्यटन स्थळ म्हणून सादर करणे हा होता. ज्योतीच्या प्रवासाचा, राहण्याचा आणि प्रवासाचा सर्व खर्च सरकारने उचलला होता. २०२४ ते २०२५ दरम्यान ज्योतीने कन्नूर, कोझिकोड, कोची, अलाप्पुझा आणि मुन्नार सारख्या सुंदर भागांना भेट दिली होती. हे सर्व केरळ सरकारच्या इन्फ्लुएंसर प्रोग्राम अंतर्गत घडले, ज्यामध्ये ज्योतीसोबत इतर अनेक डिजिटल निर्माते देखील सहभागी होते.

यावेळी ज्योतीने तिच्या व्लॉगिंगद्वारे केरळचे सौंदर्य जगासमोर सादर केले. गेल्या काही महिन्यांत, ज्योतीवर अनेक वेळा पाकिस्तानला प्रवास केल्याचा आणि तेथील गुप्तचर संस्थांच्या अधिकाऱ्यांशी, विशेषतः पाकिस्तान उच्चायोगातील कर्मचाऱ्यांशी संबंध ठेवल्याचा आरोप होता. या अधिकाऱ्यांपैकी एका अधिकाऱ्याला नंतर भारताने देशातून हाकलून लावले.

पंजाब, हरियाणा आणि उत्तर प्रदेशातील एका मोठ्या हेरगिरी नेटवर्कविरुद्धच्या कारवाईत अटक करण्यात आलेल्या १२ जणांमध्ये ज्योतीचा समावेश आहे. या नेटवर्कवर भारतीय सोशल मीडिया इन्फ्लूएन्सरना लक्ष्य करून गुप्त माहिती गोळा केल्याचा आरोप आहे. ज्योतीच्या ट्रॅव्हल विथ जो या यूट्यूब चॅनलचीही चौकशी सुरू आहे.