Malegaon Dongrale Case : नाशिक जिल्ह्यातील मालेगाव तालुक्यातील डोंगराळे येथे साडेचार वर्षांच्या चिमुरडीवर लैंगिक अत्याचार करून तिची निर्घृण हत्या केल्याच्या प्रकरणात न्यायालयाने महत्त्वपूर्ण निकाल दिला आहे. या प्रकरणातील आरोपी विजय खैरनार याला मालेगाव येथील अपर जिल्हा व सत्र न्यायालयाने फाशीची शिक्षा सुनावली आहे. ही घटना अत्यंत गंभीर असून, दुर्मिळातील दुर्मिळ प्रकरण असल्याचे महत्वपूर्ण निरीक्षण न्यायालयाने नोंदवले. तसेच पीडितेच्या कुटुंबीयांना १० लाख रुपयांची भरपाई देण्याचे आदेशही देण्यात आले आहेत.

दहा महिन्यांनंतर न्यायालयाचा महत्त्वपूर्ण निर्णय

१६ नोव्हेंबर २०२५ रोजी डोंगराळे येथे ही संतापजनक घटना घडली होती. आरोपीने चिमुरडीवर लैंगिक अत्याचार करून गळा आवळून तिची हत्या केली. या घटनेमुळे राज्यभरात संतापाची लाट उसळली होती. या प्रकरणाचा निकाल न्यायाधीश के. जी. पालेदार यांनी दिला. सुनावणीदरम्यान आरोपी विजय खैरनार आणि त्याचे वकील व्हिडिओ कॉन्फरन्सिंगद्वारे न्यायालयात उपस्थित होते. निकालाच्या वेळी पीडितेच्या कुटुंबीयांसह मंत्री दादा भुसे आणि विविध सामाजिक व राजकीय संघटनांचे पदाधिकारी आणि कार्यकर्ते न्यायालय परिसरात उपस्थित होते.

२३ दिवसांत आरोपपत्र दाखल

मालेगाव तालुका पोलिसांनी या प्रकरणाचा सखोल तपास केला. तपासाच्या सुरुवातीच्या २३ दिवसांत ४२५ पानांचे आरोपपत्र न्यायालयात सादर करण्यात आले होते. या खटल्यात पोलीस अधिकारी, ग्रामस्थ, पीडितेचे कुटुंबीय आणि वैद्यकीय अधिकारी अशा एकूण २४ साक्षीदारांची साक्ष नोंदवण्यात आली.

सरकारच्या वतीने ज्येष्ठ विशेष सरकारी वकील उज्ज्वल निकम यांनी न्यायालयात बाजू मांडली. उपलब्ध पुरावे आणि साक्षीदारांच्या जबाबांच्या आधारे त्यांनी आरोपीविरोधातील युक्तिवाद केला. सुरुवातीपासूनच आरोपीला फाशीची शिक्षा देण्याची मागणी करण्यात येत होती.

पीडित कुटुंबाला १० लाखांची भरपाई

या प्रकरणातील निकाल देताना न्यायालयाने गुन्ह्याचे गांभीर्य लक्षात घेऊन आरोपीला फाशीची शिक्षा सुनावली. याशिवाय पीडितेच्या कुटुंबीयांना १० लाख रुपयांची आर्थिक मदत देण्याचे आदेश दिले. चिमुरडीवरील अत्याचार आणि हत्येच्या या प्रकरणाने राज्यभरातून संताप व्यक्त करण्यात आला होता. न्यायालयाच्या या निर्णयामुळे पीडित कुटुंबाला न्याय मिळाल्याची भावना व्यक्त केली जात आहे.

Anand Dubey : उबाठा गटाला सर्वात मोठा धक्का! आदित्य ठाकरेंच्या निकटवर्तीयाने साथ सोडली