Junnar News – जुन्नर शिवाई देवी यात्रा कमिटीच्या आर्थिक हिशोबामध्ये गेल्या काही वर्षांपासून अनियमितता असल्याने तसेच अनागोंदी कारभाराबाबत जुन्नरकर नागरिकांना यात्रेचा खरा हिशोब आणि इतर विषयांबाबत चर्चा करण्याकरिता सार्वजनिक ठिकाणी आयोजित करण्यात आलेल्या गाव बैठकीमध्ये एकमेकांवर आरोप-प्रत्यारोपांनी चांगलीच गाजली. जोरदार आरडाओरडा, गोंधळ व्यक्तिगत हेवेदावे हमरी-तुमरी झाल्याने पोलीस बंदोबस्तामध्ये पार पडली. श्री शिवाई देवी यात्रा बचाव समिती आणि जुन्नरकर सजग नागरिकांच्या वतीने शनिवार (दि. १४) रोजी धान्यबाजार येथे गाव बैठक आयोजित करण्यात आली होती. या गाव बैठकीमध्ये नगरसेवक अनिल रोकडे, भूषण मते, माजी नगराध्यक्ष शाम पांडे, माजी उपनगराध्यक्ष अंबर परदेशी, माजी नगरसेवक मधुकर काजळे, संतोष केदारी, नगरसेवक समीर पुरवंत, भाऊ कुंभार, दर्शन फुलपगार, सुरज नानावटी, पुष्कराज जंगम, मधुकर भिडे, अभय पाठक, राजेंद्र खत्री आदींसह ग्रामस्थ मोठ्या संख्येने सहभागी झालेले होते. जुन्नर शहर शिवाई यात्रा कमिटीचा कारभार मागील दोन वर्षांपासून वादाच्या भोवऱ्यात अडकलेला आहे. यात्रा कमिटीचे माजी अध्यक्ष अनिल रोकडे यांनी शिवाई देवी यात्रेच्या आर्थिक व्यवहाराबाबत वारंवार आवाज उठविला होता. यात्रा कमिटी मांडत असलेल्या हिशोबाचा लेखाजोखा मागत ते होते व यात मोठी तफावत असल्याचे त्यांनी यावेळी स्पष्ट केले. या हिशोबाबाबत त्यांनी उपोषणाचा इशारा देखील दिला होता. परंतु गावातील काही ज्येष्ठांनी मध्यस्थी करून हे उपोषण स्थगित करून हिशोबाची बैठक आयोजित करण्याचे आश्वासन दिले होते. पंधरा दिवसांपूर्वी तक्रारदार अनिल रोकडे यांनी जुन्नरकर ग्रामस्थांना माहिती देण्यासाठी पत्रकार परिषदेचे आयोजन देखील केले होते परंतु यावेळी शिवाई देवी यात्रा कमिटीचे विद्यमान अध्यक्ष अंबर परदेशी यांनी हा हिशोब सार्वजनिक ठिकाणी गाव बैठकीत देणार असल्याचे सांगितले होते व त्यानुसार ही बैठक पार पडली. शिवाई देवी नगरसेवक अनिल रोकडे यांच्या म्हणण्यानुसार यात्रा कमिटीची सुमारे ९३ लाख रुपयांचा हिशोब असून त्याचा हिशोब ते मागत होते परंतु शिवाई देवी सेवा संस्थेचे श्याम खोत व अंबर परदेशी यांनी आज ६६ लाख ८४ हजार रुपयांचा हिशोब गाव बैठकीत सादर केल्याने आजच्या बैठकीमध्ये प्रचंड गोंधळ उडाला. दरम्यान, तक्रारदार अनिल रोकडे यांनी जुन्नर मधील काही नागरिकांचा समावेश असलेली शिवाई देवी यात्रा कमिटी नव्याने स्थापना केली होती. याबाबत नागरिकांनी त्यांना ग्रामस्थांना विचारात घेऊन कमिटी स्थापन केली का नाही असा प्रश्न उपस्थित केला, तसेच गेली २५ वर्ष कार्यरत असलेल्या जुन्नर शहर शिवाई देवी यात्रा कमिटीचे अध्यक्षपदी अंबर परदेशी यांची निवड कोणालाही विश्वासात न घेता करण्यात आल्याचा आरोप नागरिकांनी यावेळी केला. या प्रश्नाबाबत तोडगा काढण्यासाठी शहरातील ११ जबाबदार नागरिकांची कमिटी याच बैठकीमध्ये निवडण्यात आली व या कमिटीने साधक बाधक चर्चा करून यात्रेचा लेखाजोखा व इतर बाबींचा खुलासा येत्या आठ दिवसात शहरातील नागरिकांसमोर सादर करावा असे या गाव बैठकीत एकमताने ठरले. देगणीची रक्कम गायब… या शिवाई देवी यात्रेमध्ये गेल्या अनेक वर्षांपासून शर्मा नामक व्यक्ती आकाश पाळणे व इतर अनेक मनोरंजनाची साहित्य घेऊन व्यवसाय करीत असतो, तो जाताना देणगी स्वरूपात मोठी रक्कम देत असतो. परंतु ही दिलेली रक्कम यात्रेच्या हिशोबात दर्शवली जात नाही, असा आरोप अनिल रोकडे व जुन्नर शहरवासीयांनी केला. तसेच तसेच शर्मा याने यात्रा कमिटीला आतापर्यंत किती मोठ्या रक्कमा दिल्याचे प्रतिज्ञापत्र करून दिले आहे. परंतु आजच्या गाव बैठकीमध्ये चर्चा होत असताना हे प्रतिज्ञापत्र खोटे आहे, असे काही जणांनी सांगून खोटे प्रतिज्ञापत्र देणाऱ्या शर्मा विरोधात गुन्हा दाखल का करण्यात येऊ नये अशी विचारणा केली गेली.
