Junnar News : जुन्नर (Junnar News) शहरातील माई मोहल्ला भागात पोलिसांनी पहाटेच्या सुमारास एका खोलीवर धाड टाकून तब्बल २७० किलो गोवंश मांस (गोमांस) जप्त केले आहे. याप्रकरणी पोलिसांनी तिघांना ताब्यात घेतले असून, जुन्नर पोलीस ठाण्याचे पोलीस निरीक्षक दत्तात्रय गुंड यांनी ही माहिती दिली.

पहाटेच्या सुमारास पडला छापा

१६ जुलै रोजी पहाटे ४ वाजण्याच्या सुमारास माई मोहल्ला येथे गोवंशाची कत्तल करून मांस एका खोलीत लपवून ठेवल्याची गोपनीय माहिती पोलिसांना मिळाली होती. जुन्नर (Junnar News) उपविभागीय पोलीस अधिकारी धनंजय पाटील यांच्या आदेशानुसार, पोलीस निरीक्षक दत्तात्रय गुंड आणि पोलीस उपनिरीक्षक ऋषिकेश टिटमे यांच्या पथकाने या ठिकाणी पाळत ठेवून छापा टाकला. या कारवाईत खोलीतून २७० किलो गोमांस जप्त करण्यात आले.

तिघांना घेतले ताब्यात, जुने गुन्हेगार फरार

याप्रकरणी पोलिसांनी खालील तिघांना ताब्यात घेतले आहे. रेहान दस्तगीर कुरेशी (वय ३५, रा. माई मोहल्ला), अदनान अल्ताफ बेपारी (वय २५, रा. शिपाई मोहल्ला), आतिक अहमद कुरेशी (वय ३६, रा. माई मोहल्ला) यांना अटक करण्यात आली आहे.

ज्या खोलीत हे मांस सापडले ती खोली फुरकान इब्राहिम बेपारी याच्या मालकीची असून, त्याच्यावर यापूर्वीही गोवंशाशी संबंधित गुन्हे दाखल आहेत. याशिवाय मुजम्मिल कुरेशी, बिलाल कुरेशी, समीर कुरेशी आणि शरीन बेपारी या संशयितांवरही आधीचे गुन्हे दाखल असून, पोलीस सध्या त्यांचा शोध घेत आहेत.

आर्म ॲक्टमधील फरार आरोपीलाही ठोकल्या बेड्या!

याच कारवाईदरम्यान जुन्नर पोलिसांनी ‘आर्म ॲक्ट’ (बेकायदेशीर शस्त्र बाळगणे) प्रकरणातील फरार आरोपी मोहसिन इकबाल अत्तार (वय २४) याला देखील अटक केली असून, त्याला माननीय न्यायालयात हजर करण्यात आले आहे.

पोलीस प्रशासनाचा इशारा
पुणे ग्रामीणचे पोलीस अधीक्षक संदीपसिंह गिल यांनी जुन्नर पोलीस ठाण्याच्या हद्दीत गोमांस विक्री आणि गोवंश कत्तलीविरोधात कठोर पावले उचलण्याचे आदेश दिले आहेत. यापुढेही अशा प्रकारची बेकायदेशीर कृत्ये करणाऱ्यांवर कडक कारवाई सुरूच राहील, असा इशारा पोलिसांनी दिला आहे.

कारवाई करणारे पोलीस पथक
सदर कारवाई (Junnar News) अप्पर पोलीस अधीक्षक डॉ. शुभम कुमार आणि उपविभागीय पोलीस अधिकारी धनंजय पाटील यांच्या मार्गदर्शनाखाली करण्यात आली. यामध्ये पोलीस निरीक्षक दत्तात्रय गुंड, उपनिरीक्षक ऋषिकेश टिटमे, पोलीस हवालदार सागर शिंदे, मालवणकर, पठारे, पोलीस शिपाई कैलास केंद्रे, भागवत, शंभू निरडे, दादा पावडे तसेच जुन्नर उपविभागाच्या आर.सी.पी. (RCP) पथकाचा समावेश होता.