आळेफाटा- जुन्नर तालुक्याचे आमदार शरद सोनवणे यांनी रामोशी आणि फासेपारधी समाजाबद्दल केलेल्या आक्षेपार्ह वक्तव्यामुळे आळेफाटा येथे रामोशी समाजाने एकत्र येत त्यांचा जाहीर निषेध केला. यावेळी आंदोलकांनी आमदार सोनवणे यांच्या प्रतिमेवर शाई फेकली आणि जाहीर माफी मागण्याची मागणी केली. माफी न मागितल्यास तीव्र आंदोलनाचा इशारा देण्यात आला होता. दरम्यान, आमदार सोनवणे यांनी आळेफाटा चौकातील आंदोलनस्थळी भेट देऊन रामोशी समाजाची जाहीर माफी मागितली, ज्यामुळे तूर्तास वातावरण निवळले आहे. काय आहे प्रकरण? शुक्रवार, (दि. २५ जुलै) रोजी जुन्नर येथे सर्व अधिकाऱ्यांची आढावा बैठक आयोजित करण्यात आली होती. बैठकीनंतर माध्यमांशी बोलताना आमदार शरद सोनवणे यांनी, “जुन्नर तालुक्यात चोरीचे प्रमाण वाढले असून, अहमदनगर जिल्ह्यातून रामोशी आणि फासेपारधी समाज येथे येऊन चोऱ्या करतात,” असे वक्तव्य केले. या वक्तव्याने दोन्ही समाजांमध्ये तीव्र असंतोष निर्माण झाला. परिणामी, आळेफाटा येथे रामोशी समाजाने आंदोलन करत आमदारांविरोधात संताप व्यक्त केला. आंदोलन आणि माफी – आंदोलनात शंकर गोफणे, किरण मंडाले, सरपंच मुकुंद भंडलकर, आप्पासाहेब बोरुडे, नंदू चव्हाण, विपुल येलमर, गौरी शिरतर, बाळासाहेब शिरतर, धोंडीभाऊ भंडलकर, बबलू भंडलकर, साईनाथ शिरतर, सोनभाऊ भंडलकर, राहुल शिरतर, जितेंद्र भंडलकर, बाळासाहेब मस्कुले, नवनाथ शिरतर, गणेश गोफणे, रोहिदास बोरुडे, संदीप शितोळे, बाळासाहेब शितोळे, सोमेश्वर भंडलकर यांच्यासह अनेकांनी सहभाग घेतला. आळेफाटा पोलिसांनी चोख बंदोबस्त ठेवला होता. आंदोलनाची तीव्रता पाहता आमदार सोनवणे यांनी घटनास्थळी भेट देऊन, “माझ्या वक्तव्याने रामोशी आणि फासेपारधी समाजाच्या भावना दुखावल्या असतील, तर मी जाहीर माफी मागतो,” असे निवेदन जारी केले. वातावरण निवळले, पण चर्चा कायम – आमदार सोनवणे यांच्या माफीनाम्यामुळे आंदोलन तात्पुरते थांबले असले, तरी या वक्तव्याने निर्माण झालेली नाराजी आणि राजकीय चर्चा तालुक्यात कायम आहे. समाजबांधवांनी यापुढे अशी वक्तव्ये टाळण्याची मागणी केली आहे. “माझ्या वक्तव्याने रामोशी व फासेपारधी समाजाच्या भावना दुखावल्याने मी या समाजबांधवांची जाहीर माफी मागतो.” – आमदार शरद सोनवणे
