Junnar Crime – जुन्नर येथील शासकीय आदिवासी मुलींच्या वसतिगृहातील १८ वर्षीय तरुणीवर लग्नाला नकार दिल्याचा रागातून एका तरुणाने लोखंडी कोयत्याने जीवघेणा हल्ला केल्याची धक्कादायक घटना बुधवारी सकाळी दहाच्या सुमारास घडली. गौरी संजय सावळे (वय १८, रा. आंबे, ता. जुन्नर) असे या हल्ल्यात गंभीर जखमी झालेल्या तरुणीचे नाव असून, तिला तातडीने जुन्नरमधील यशवंतराव चव्हाण रुग्णालयात उपचारासाठी दाखल करण्यात आले आहे. मिळालेली माहिती अशी की, पीडित तरुणी बुधवारी सकाळी वसतिगृहातून महाविद्यालयात जाण्यासाठी बाहेर पडली होती. यावेळी रस्त्यात असलेल्या एका पत्राशेडजवळ आरोपी महेश मुरलीधर डामसे (वय २०, रा. आंबे, ता. जुन्नर) याने तिला अडवले. तू लग्नाला नकार का देतेस, असे म्हणत त्याने खुनाच्या उद्देशाने तिच्यावर कोयत्याने ठिकठिकाणी वार केले. गंभीर दुखापत झाल्यानंतर आरोपी घटनास्थळावरून पळून गेला. जखमी गौरीने दिलेल्या फिर्यादीवरून जुन्नर पोलिसात गुन्हा दाखल करण्यात आला आहे. ही घटना घडलेले आदिवासी मुलींचे वसतिगृह मुख्य शहरापासून लांब आणि निर्जन ठिकाणी असल्याने मुलींच्या सुरक्षिततेचा प्रश्न पुन्हा ऐरणीवर आला आहे. घटनेची माहिती मिळताच पोलीस निरीक्षक किरण अवचर आणि सहायक पोलीस निरीक्षक अरविंद गटकुळ यांनी घटनास्थळी धाव घेतली. स्थानिक गुन्हे शाखा आणि फॉरेन्सिक पथकाकडून पुरावे गोळा करण्यात आले आहेत. या भयंकर प्रकारामुळे वसतिगृहातील विद्यार्थिनींमध्ये भीतीचे वातावरण पसरले असून, पोलीस आरोपीचा कसून शोध घेत आहेत.
