Josh Hazlewood Catch Drop Taskin Ahmed Collision Obstructing The Field Appeal Rejected : ऑस्ट्रेलिया आणि बांगलादेश यांच्यात मॅके येथे सुरू असलेल्या दुसऱ्या कसोटी सामन्याच्या पहिल्या दिवशी मैदानात एका नाट्यमय आणि विचित्र घटनेने सर्वांचे लक्ष वेधून घेतले. बांगलादेशच्या पहिल्या डावादरम्यान फलंदाज तस्किन अहमदचा (Taskin Ahmed) झेल टिपण्यासाठी सज्ज झालेला वेगवान गोलंदाज जोश हेझलवूड (Josh Hazlewood) आणि तस्किन यांच्यात जोरदार धडक झाली. यामुळे हेझलवूडच्या हातून सोपा झेल सुटला. यानंतर ऑस्ट्रेलियन संघाने तस्किनला ‘ऑब्स्ट्रक्टिंग द फील्ड’ (Obstructing the field) नियमांतर्गत बाद देण्याची जोरदार मागणी केली, मात्र पंचांनी हे अपील फेटाळून लावले.

झेल टिपतानाच झाली धडक; मैदानातील प्रेक्षकही अवाक्!

नाणेफेक जिंकून प्रथम गोलंदाजी करताना ऑस्ट्रेलियाने भेदक माऱ्याच्या जोरावर बांगलादेशचे अवघ्या ३८ धावांत ८ फलंदाज तंबूत धाडले होते. डावातील २८ व्या षटकाच्या तिसऱ्या चेंडूवर तस्किन अहमदने हवेत फटका मारला. स्वतः गोलंदाज जोश हेझलवूड झेल टिपण्यासाठी चेंडूच्या खाली धावत आला. मात्र, नेमका त्याच वेळी धाव घेण्यासाठी धावणारा तस्किन अहमद थेट हेझलवूडला जाऊन आदळला. या जोरदार धडकेमुळे हेझलवूडच्या हातातून चेंडू निसटला आणि तस्किनला जीवनदान मिळाले.

पॅट कमिन्सने मागितली विकेट; पंचांनी का दिला नकार?

Who was in the wrong here? #AUSvBAN

WATCH: https://t.co/AaOYfRyuNl pic.twitter.com/KfGS0lH7lG

— cricket.com.au (@cricketcomau) August 22, 2026

धडक बसल्यानंतर हेझलवूडने तस्किनने मुद्दाम धक्का दिल्याची तक्रार केली. कर्णधार पॅट कमिन्सनेही (Pat Cummins) पंचांकडे जात तस्किनला बाद ठरवण्याची आक्रमक मागणी केली. मात्र, पंचांनी घटना तपासून अपील फेटाळले. पंचांच्या मते, तस्किन अहमद जेव्हा धावण्यासाठी पुढे आला, तेव्हा त्याचे लक्ष चेंडूकडे नव्हते आणि त्याने जाणीवपूर्वक हेझलवूडचा मार्ग अडवला नव्हता. ही धडक अपघाती असल्याने नियमाचा भंग झाला नसल्याचे पंचांनी स्पष्ट केले. मात्र, तस्किनला या जीवनदानाचा फायदा उठवता आला नाही आणि तो अवघ्या एका धावेवर कमिन्सचाच बळी ठरला.

हेही वाचा – Pant Towel Video : श्रीलंकेतील कडक उन्हावर मात करण्यासाठी ऋषभ पंतचा देसी जुगाड, VIDEO होतोय व्हायरल

काय सांगतो ‘ऑब्स्ट्रक्शन ऑफ द फिल्ड’ नियम?

मेरीलबोर्न क्रिकेट क्लबच्या (MCC) नियमावलीनुसार, जर एखाद्या फलंदाजाने जाणीवपूर्वक (Willfully) बोलून, हावभाव करून किंवा पळताना अचानक दिशा बदलून क्षेत्ररक्षकाला अडथळा निर्माण केला किंवा त्याचे लक्ष विचलित केले, तरच त्याला ‘ऑब्स्ट्रक्टिंग द फील्ड’ नियमानुसार बाद ठरवले जाते. बांगलादेशचा संपूर्ण डाव अवघ्या ६४ धावांत संपुष्टात आला असला, तरी या घटनेची जोरदार चर्चा क्रीडा विश्वात रंगली आहे.