न्यूयॉर्क : करोनाचा सामना करण्यासाठी जगातील सध्या अनेक देशांनी लसीकरण मोहीम हाती घेतली आहे. करोनाचा सर्वाधिक फटका बसलेल्या अमेरिकेतही लसीकरण मोहीम सुरु आहे. या दरम्यान अमेरिकेचे राष्ट्राध्यक्ष जो बायडन यांनी मोठी घोषणा केली आहे. लसीकरण पूर्ण झाले असेल त्यांनी आता मास्क घालण्याची आवश्यकता नसल्याचे जो बायडन यांनी सांगितले आहे. रोग नियंत्रण आणि प्रतिबंध केंद्राकडून (सीडीसी) यासंबंधी मार्गदर्शक तत्वे जाहीर करण्यात आली असून त्याचा उल्लेख करत त्यांनी ही माहिती दिली.

सीडीसीने नव्याने मार्गदर्शक तत्वे जाहीर केली असून लसीकरण पूर्ण झालेल्यांनी मास्क घालण्याची गरज नसल्याचे सांगितले आहे. मात्र यावेळी त्यांनी ज्यांचे अद्यापही लसीकरण झालेले नाही त्यांनी अंतिम टप्पा गाठेपर्यंत आपली सुरक्षा करणे गरजेचे असल्याचेही नमूद केले आहे. व्हाईट हाऊसमध्ये बोलताना बायडन यांनी सांगितले की, “काही तासांपूर्वीच सीडीसीने आपण पूर्ण लसीकरण केलेल्या लोकांना आता मास्क घालण्याची गरज नसल्याची शिफारस केली आहे. ही शिफारस खरी असून घरात किंवा घराबाहेर दोन्हीकडे लागू आहे. मला वाटतं हा मोलाचा टप्पा आहे. एक मोठा दिवस असून नागरिकांचं लवकरात लवकर लसीकरण केल्यानेच हे यश संपादन करणं शक्य झालं आहे”.

According to new CDC guidance, fully vaccinated people can stop wearing masks in most settings. To find a vaccine near you go to https://t.co/S2DQV6MlBv. pic.twitter.com/gN6GL5YJ3t

— The White House (@WhiteHouse) May 13, 2021

“गेल्या १४४ दिवसांपासून आपण लसीकरण करत असून जगाचे नेतृत्व केले आहे. संशोधक, शास्त्रज्ञ, औषध कंपन्या, लष्कर, फेमा, डॉक्टर्स, परिचारिका, द नॅशनल गार्ड, गव्हर्नर अशा अनेकांच्या मेहनतीमुळे हे शक्य झालं आहे. जास्तीत जास्त अमेरिकन नागरिकांचं लसीकरण व्हावं यासाठी आकाश आणि जमीन एक करणाऱ्या प्रत्येकामुळे हे शक्य झालं,” असे बायडन यांनी म्हटले आहे. पुढे ते म्हणाले की, “एक दिवस येईल जेव्हा गमावलेल्या प्रिय व्यक्तीची आठवण आपल्या डोळ्यांत अश्रू आणण्याआधी चेहऱ्यावर स्मितहास्य आणेल”. बायडन यांनी यावेळी अद्यापही लसीकरण न झालेल्यांनी मास्क घालण्याची गरज असल्याचे स्पष्ट केले आहे.

If you are fully vaccinated, you no longer need to wear a mask… This was made possible by the extraordinary success we’ve had in vaccinating so many Americans, so quickly: US President Joe Biden pic.twitter.com/Xr5TKk4S1a

— ANI (@ANI) May 13, 2021

“आपण इतक्या दूरपर्यंत आलो आहोत, त्यामुळे जोपर्यंत आपण अंतिम रेषेपर्यंत पोहोचत नाही तोपर्यंत आपली सुरक्षा करा. कारण ही मोठी घोषणा असून, आपली निराशा होऊ नये अशी इच्छा आहे. करोना संकट किती कठीण होतं याची आपल्याला कल्पना आहे. प्रत्येकाचे लसीकरण होणे हीच सर्वात सुरक्षित बाब आहे,” असे आवाहन बायडन यांनी यावेळी केले. सीडीसीने बुधवारी पूर्ण लसीकरण झालेल्यांनी आता घऱात किंवा घराबाहेर मास्क घालण्याची गरज नसल्याचं जाहीर केलं आहे. तसंच कोणत्याही निर्बंधांविना आपल्या दैनंदिन गोष्टी ते सुरु करु शकतात असेही सांगितले आहे.