Jio Platforms : जिओ प्लॅटफॉर्म्स लिमिटेडचा (JPL) शेअर बाजारातील प्रवेश २८ ऑक्टोबर २०२६ रोजी होणार आहे. कंपनीने २७ कोटी नवीन शेअर्स १,११९ रुपये प्रति शेअर या दराने विकून तब्बल १०.३ लाख कोटी रुपयांचे मूल्यांकन मिळवले आहे. भारतीय भांडवली बाजाराच्या इतिहासात १० लाख कोटी रुपयांपेक्षा जास्त मूल्यांकनावर आयपीओ आणणारी ही पहिली कंपनी ठरली आहे.

आयपीओच्या मूल्यांकनानुसार जिओ प्लॅटफॉर्म्स भारतातील चौथी सर्वात मोठी कंपनी ठरते. तिच्या पुढे रिलायन्स इंडस्ट्रीज १६.२ लाख कोटी, भारती एअरटेल १२.२ लाख कोटी आणि एचडीएफसी बँक १०.६ लाख कोटी रुपये मूल्यांकनासह आहेत.

आयपीओला मिळालेली मोठी मागणी आणि ग्रे मार्केटमधील प्रीमियम पाहता जिओच्या शेअरची सुरुवात आयपीओ किमतीपेक्षा जास्त होण्याची शक्यता व्यक्त केली जात आहे. जर शेअर २०% प्रीमियमसह १,३४० रुपयांवर सूचीबद्ध झाला, तर कंपनीचे बाजारमूल्य १२.३ लाख कोटी रुपयांपेक्षा जास्त होईल. अशा स्थितीत जिओ भारतातील दुसरी सर्वात मूल्यवान कंपनी ठरेल.

जिओ आणि रिलायन्स इंडस्ट्रीजचे आयपीओ मूल्यांकन एकत्र केल्यास रिलायन्स समूहाचे मूल्य २७ लाख कोटी रुपयांपेक्षा जास्त होईल. २७ ऑक्टोबरपर्यंत टाटा समूहातील ३२ सूचीबद्ध कंपन्यांचे एकत्रित बाजारमूल्य सुमारे २५.७ लाख कोटी, तर अदानी समूहातील ११ कंपन्यांचे बाजारमूल्य सुमारे १६.६ लाख कोटी रुपये आहे. जिओचा शेअर प्रीमियमवर सूचीबद्ध झाल्यास रिलायन्स समूह ३० लाख कोटी रुपयांच्या बाजारमूल्याच्या जवळ पोहोचू शकतो. हे भारतीय उद्योग समूहासाठी ऐतिहासिक उच्चांक ठरू शकते.