रांची  – सध्याचे मुख्यमंत्री हेमंत सोरेन ते माजी मुख्यमंत्री बाबूलाल मरांडी आणि चंपाई सोरेन या निवडणुकीत नशीब आजमावत आहेत. याशिवाय इतर अनेक माजी मुख्यमंत्र्यांच्या नातेवाईकांनाही या निवडणुकीत उमेदवारी देण्यात आली आहे.

शिबू सोरेन 02 मार्च 2005 ते 11 मार्च 2005, ऑगस्ट 2008 ते जानेवारी 2009 आणि डिसेंबर 2009 ते मे 2010 पर्यंत राज्याचे मुख्यमंत्री होते. त्यांचे पुत्र आणि मुख्यमंत्री हेमंत सोरेन बऱ्हेत विधानसभा मतदारसंघातून निवडणूक लढवत आहेत. यापूर्वी ते जुलै 2013 ते डिसेंबर 2014 आणि डिसेंबर 2019 ते जानेवारी 2024 पर्यंत मुख्यमंत्री होते. 4 जुलै 2024 पासून तिसऱ्यांदा झारखंडचे मुख्यमंत्रीपद स्वीकारले.

झारखंड मुक्ती मोर्चाने मुख्यमंत्री हेमंत यांच्या पत्नी कल्पना सोरेन यांना गांडे मतदारसंघातून तिकीट दिले आहे. शिबू सोरेन यांचे बंधू बसंत सोरेन जेएमएमच्या तिकिटावर दुमका येथून निवडणूक लढवत आहेत. तर सोरेन यांची सून (कै. दुर्गा सोरेन यांच्या पत्नी) सीता जामतारा विधानसभा मतदारसंघातून भाजपच्या उमेदवार आहेत. सीता सोरेन यांना लोकसभेत दुमका मतदारसंघातून पराभवाला सामोरे जावे लागले होते.

अर्जुन मुंडा यांच्या पत्नीही मैदानात
झारखंडचे तीन वेळा मुख्यमंत्री राहिलेल्या अर्जुन मुंडा यांच्या पत्नी मीरा याही पोटका मतदारसंघातून नशीब आजमावत आहेत. अर्जुन मुंडा नुकतेच लोकसभा निवडणूकीत पराभूत झाले होते. मुंडा हे मार्च 2003 ते मार्च 2005, मार्च 2005 ते सप्टेंबर 2006 आणि सप्टेंबर 2010 ते जानेवारी 2013 पर्यंत झारखंडचे मुख्यमंत्री होते.

पहिले मुख्यमंत्रीही रिंगणात-
राज्याचे पहिले मुख्यमंत्री बाबुलाल मरांडी हे धनवार मतदारसंघातून भाजपचे उमेदवार आहेत. नोव्हेंबर 2000 ते मार्च 2003 पर्यंत ते झारखंडचे मुख्यमंत्री होते. मरांडी हे सध्या झारखंड भाजपचे प्रदेशाध्यक्ष आहेत. झारखंडच्या इतिहासात संपूर्ण पाच वर्षे सरकार चालवणारा एकच मुख्यमंत्री आहे आणि ते म्हणजे रघुबर दास. त्यांची सून पूर्णिमा दास साहू यांना भाजपने जमशेदपूर पूर्व मतदारसंघातून उमेदवारी दिली आहे. 2014 ते 2019 पर्यंत झारखंडवर राज्य करणारे रघुबर दास सध्या ओडिशाचे राज्यपाल आहेत.

चंपाई आणि त्यांचा मुलगाही रिंगणात-
माजी मुख्यमंत्री चंपाई सोरेन भाजपच्या तिकिटावर सेराईकेला मतदारसंघातून आपले नशीब आजमावत आहेत. चंपाई सोरेन यांचा मुलगा बाबूलालही निवडणूक लढवत आहे. भाजपने त्यांना घाटशिला राखीव जागेवरून संधी दिली आहे. तत्कालीन मुख्यमंत्री हेमंत सोरेन यांच्या अटकेनंतर चंपाई सोरेन यांनी सुमारे सहा महिने झारखंडची सत्ता हाती घेतली. 2 फेब्रुवारी 2024 ते 3 जुलै 2024 पर्यंत ते मुख्यमंत्री होते आणि हेमंत सोरेन तुरुंगातून बाहेर आल्यानंतर त्यांना खुर्ची गमवावी लागली. माजी मुख्यमंत्री चंपाई सोरेन यांनी 30 ऑगस्ट रोजी भारतीय जनता पक्षात प्रवेश केला.

मधू कोडा यांच्या पत्नीही निवडणुकीच्या मैदानात –
अपक्ष आमदार झाल्यानंतर झारखंडचे मुख्यमंत्री बनलेल्या मधु कोडा यांचे कुटुंबीयही या निवडणुकीत जोरदार प्रयत्न करत आहेत. मधू कोडा यांच्या पत्नी गीता कोडा या जगन्नाथपूर मतदारसंघातून भाजपच्या उमेदवार आहेत. मधू कोडा हे सप्टेंबर 2006 ते ऑगस्ट 2008 पर्यंत झारखंडचे मुख्यमंत्री होते. झारखंडच्या इतिहासात अपक्ष आमदाराच्या नेतृत्वाखाली सरकारची ही पहिलीच वेळ होती.