तेल अवीव, (इस्रायल) : हमास आणि इस्रायलमध्ये झालेल्या युद्धबंदीच्या करारातील अडथळे दूर करण्यासाठी अमेरिकेचे उपाध्यक्ष जे.डी. वान्स आज इस्रायलमध्ये दाखल झाले. गेल्या काही दिवसात झालेला हिंसाचार आणि दीर्घकालीन शांतता प्रस्थापित करण्याच्या योजनेच्या अंमलबजावणीच्या अडचणींमुळे हा युद्धबंदी करार धोक्यात आला होता. रविवारी दहशतवाद्यांनी इस्रायली सैनिकांवर केलेल्या गोळीबारात इस्रायलचे दोन सैनिक मारले गेले होते. या गोळीबाराला इस्रायलने दिलेल्या प्रत्युत्तरामध्ये ४५ पॅलेस्टिनी ठार झाले. युद्धबंदी लागू झाल्यापासून आतापर्ंयत एकूण ८० जण ठार झाले आहेत. गाझा सिटी आणि खान युनुस शहरांमध्येही अशाच प्रकारचे हल्ले इस्रायली सैन्याच्यावतीने करण्यात आले दहशतवाद्यांनी पिवळी शांतता रेषा ओलांडल्याचा आरोप इस्रायली सैन्याने केला होता. इस्रायल वारंवार युद्धबंदीचे उल्लंघन करत असल्याची टीका कतारचे अमिर शेख तमिम बिन हमाद अल थानी यांनीही केली आहे. युद्धबंदीबाबत अमेरिकेचे दोन दूत यापुर्वीच इस्रायलमध्ये आले आहेत. आता वान्स देखील गुरुवारपर्यंत या प्रक्रियेवर देखरेख करणार आहेत. त्यांच्या समवेत त्यांच्या पत्नी उषा वान्स देखील इस्रायलमध्ये आल्या आहेत. वान्स हे इस्रायलचे पंतप्रधान बेन्जामिन नेतान्याहू यांचीही भेट घेणार आहेत. ज्या इस्रायली ओलिसांचे मृतदेह अजूनही हमासच्या ताब्यात आहेत, अशांच्या नातेवाईकांचीही वान्स भेट घेणार आहेत. परत दिलेल्या मृतदेहाची ओळख पटली हमासकडून इस्रायलकडे सोपवण्यात आलेला मृतदेह ताल हाइमी या ओलिसाचाच असल्याचे इस्रायली अधिकाऱ्यांनी ओळखले आहे. तर हमास युद्धबंदीची अंमलबजावणी करायला कटिबद्ध आहे, असे हमासच्यावतीने वाटाघाटी करणाऱ्या मध्यस्थाने म्हटले आहे. एकूण १५ ओलिसांपैकी उरलेल्यांचे मृतदेह परत दिले जावे, अशी इस्रायलची अपेक्षा आहे. युद्धबंदी सुरू झाल्यापासून आतापर्यंत १३ जणांचे मृतदेह परत दिले गेले आहेत.
