Jaya Bachchan | अलिकडेच सुरू झालेल्या पापाराझीच्या ट्रेंडमुळे अनेक सेलिब्रिटींची झलक त्यांच्या कॅमेऱ्यात कैद होते. जे की सोशल मिडियावर चर्चेचा विषय ठरते. मात्र अनेकदा पापाराझीच्या असभ्य वर्तणुकीमुळे काही कलाकारही त्यांच्यावर संताप व्यक्त करताना दिसतात. यात ज्येष्ठ अभिनेत्री जया बच्चन यांच्या नावाचा देखील समावेश आहे. पापाराझींवर संतापल्याचे त्यांचे अनेक व्हिडीओ सोशल मीडियावर व्हायरल होत असतात. नुकतेच त्यांनी एका मुलाखतीत पापाराझींबाबत स्वत:चे परखड मत मांडले आहे. त्यांनी पापाराझींना ‘उंदीर’ अशी उपमा दिली आहे. एका कार्यक्रमात जया बच्चन यांना पापाराझींसोबत त्यांचं नातं कसं आहे? असा प्रश्न विचारण्यात आला. त्यावर त्या म्हणाल्या, “मीडियाशी माझं नातं चांगलं असलं तरी पापाराझींबरोबर माझं अजिबातच पटत नाही. हे कोण लोक आहेत? हे देशाचं प्रतिनिधित्व करण्यासाठी प्रशिक्षित आहेत का? फक्त यूट्यूब किंवा इतर सोशल प्लॅटफॉर्मवर काही टाकतात म्हणून यांना तुम्ही मीडिया म्हणता? माझे वडील पत्रकार होते. म्हणून मला खऱ्या पत्रकारांबद्दल फार आदर आहे, पण हे बाहेर उभे असलेले, घाणेरडी पँट घालून हातात फक्त मोबाईल घेणारे लोक… फक्त मोबाईल आहे म्हणून कोणाचाही फोटो काढायचा आणि वाटेल ते बोलायचं? कोण आहेत हे? कुठून येतात? त्यांचं शिक्षण काय, त्यांची पार्श्वभूमी काय? हे लोक आपल्या देशाचं प्रतिनिधित्व करणार?” Jaya Bachchan | एखाद्या उंदरासारखे मोबाईल घेऊन कुणाच्याही खासगी आयुष्यात घुसता जया बच्चन यांनी सोशल मीडियावर मिळणाऱ्या नकारात्मक प्रतिक्रियांबद्दल बोलताना म्हंटले की, “दिल्लीतील माझ्या एका स्टाफनं मला सांगितलं की, सोशल मीडियावर मला खूप नकारात्मकता मिळते म्हणून मी सोशल मीडियापासून दूर राहते. त्यावर मी म्हटलं, ‘मला काही फरक पडत नाही. मी तुम्हाला आवडत नाही, हे तुमचं मत आणि माझं मत असं की, मला तुम्ही अजिबात आवडत नाही. तुम्हाला वाटतं की, तुम्ही एखाद्या उंदरासारखे मोबाईल घेऊन कुणाच्याही खासगी आयुष्यात घुसतात.” Jaya Bachchan | …तर मग तुम्ही कसले सेलिब्रिटी? आजकाल अनेक तरुण कलाकार सोशल मीडियावर दिसण्यासाठी पापाराझींना पैसे देतात. यावर जया बच्चन यांनी, “मला हे लोक माहीतही नाहीत. माझा नातूही (अगस्त्य बच्चन) तरुण आहे, पण तो कुठल्याही सोशल मीडियावर नाही आणि जर विमानतळावर तुम्हाला तुमचेच फोटो काढायला फोटोग्राफर लोकांना बोलवावं लागत असेल, तर मग तुम्ही कसले सेलिब्रिटी?” अशी टीका देखील केली. दरम्यान, पापाराझीच्या चुकीच्या वर्तनामुळे अनेकदा कलाकार त्यांच्यावर संतापले आहेत. अलीकडेच सनी देओलने देखील पापाराझी यांच्यावर अक्षरश: हात जोडत संताप व्यक्त केला होता. ज्यानंतर नेटकऱ्यांनी देखील सनी देओलला पाठिंबा देत पापाराझींवर टीका केली होती. Jaya Bachchan | हेही वाचा : शेअर बाजार तेजीने उघडला! सेन्सेक्स २८६ अंकांनी वधारला ; निफ्टीने २६,२८० ओलांडले
