Jaswinder Bhalla: पंजाबी चित्रपटसृष्टी आणि विनोदविश्वाने आपला एक मोठा कलाकार गमावला आहे. प्रसिद्ध अभिनेते व हास्यकलाकार जसविंदर भल्ला यांचे वयाच्या 65 व्या वर्षी निधन झाले. मोहाली येथील फोर्टिस रुग्णालयात त्यांनी अखेरचा श्वास घेतला. त्यांच्या निधनाने संपूर्ण पंजाबी आणि हिंदी फिल्म इंडस्ट्रीत शोककळा पसरली आहे.

बॉलिवूड अभिनेता अक्षय कुमार यांनी भल्ला यांच्या निधनावर दु:ख व्यक्त करत त्यांच्या आठवणींना उजाळा दिला. सोशल मीडियावर त्यांनी भल्ला यांचा फोटो शेअर करत पंजाबीमध्ये लिहिले, “तुस्सी बहुत याद आओगे भल्ला जी.” पंजाबचे मुख्यमंत्री भगवंत मान यांनीही श्रद्धांजली अर्पण करून त्यांच्या परिवाराला धीर दिला.

हास्याची अमूल्य परंपरा

1960 साली जन्मलेले जसविंदर भल्ला हे मूळचे प्राध्यापक होते. अभ्यासाबरोबरच त्यांचा रंगमंचाकडे ओढा होता. त्यांनी लोकप्रिय स्टेज सीरिज ‘छंकता 88’ मधून कॉमेडीमध्ये प्रवेश केला आणि लोकांच्या मनात कायमचे घर केले. त्यांचा प्रसिद्ध ‘चाचा छत्रा’ हे पात्र आजही लोकांना हसवतो. व्यंग्य, सामाजिक भाष्य आणि अप्रतिम कॉमिक टायमिंगमुळे ते दशकेभर प्रेक्षकांचे लाडके राहिले.

हिट चित्रपटांचा प्रवास

जसविंदर भल्ला यांनी अनेक सुपरहिट पंजाबी चित्रपटांमध्ये काम केले. ‘कॅरी ऑन जट्टा’, ‘जट्ट अँड जुलियट 2’, ‘जट्ट एअरवेज’ यांसारख्या चित्रपटांतील त्यांच्या भूमिका आजही प्रेक्षक विसरू शकलेले नाहीत. ‘कॅरी ऑन जट्टा’मधील वकील ढिल्लों ही त्यांची भूमिका विशेष गाजली. त्यांचा शेवटचा चित्रपट ‘शिंदा शिंदा नो पापा’ (2024) होता, ज्यात ते गिप्पी ग्रेवाल आणि हिना खानसोबत दिसले.

जसविंदर भल्ला यांच्या निधनाने प्रेक्षकांनी एक असा कलाकार गमावला आहे, ज्यांच्या एका संवादाने किंवा छोट्याशा भूमिकेनेही चित्रपटाला जीवंतपणा मिळायचा.