IPL 2025 : मुंबई इंडियन्सला मोठा धक्का! जसप्रीत बुमराह सुरुवातीच्या तब्बल ‘इतक्या’ सामन्यांना मुकणार
IPL 2025 Jasprit Bumrah likely to miss initial IPL 2025 matches : मुंबई इंडियन्सचा संघ आयपीएलच्या आगामी हंगामात वेगवान गोलंदाज जसप्रीत बुमराहशिवाय आपली मोहीम सुरू करेल. अनुभवी वेगवान गोलंदाज जसप्रीत बुमराह पाठीच्या दुखापतीतून सावरत आहे आणि त्याला पूर्णपणे तंदुरुस्त होण्यासाठी आणखी काही वेळ लागेल. बुमराह बीसीसीआयच्या सेंटर ऑफ एक्सलन्स येथे पुनर्वसन प्रक्रियेतून जात आहे. एप्रिलच्या सुरुवातीला तो संघात सामील होण्याची अपेक्षा आहे.
मुंबई इंडियन्सला मोठा धक्का –
ईएसपीएन क्रिकइन्फोच्या माहितीनुसार जसप्रीत बुमराह जानेवारीमध्ये झालेल्या पाठीच्या दुखापतीतून अजूनही सावरत असल्याने तो आयपीएल २०२५ च्या पहिल्या काही सामन्यांना मुकू शकतो. मुंबई इंडियन्स मार्चमध्ये तीन सामने खेळणार आहे, त्यामुळे सुरुवातीच्या टप्प्यात संघाला वेगवान गोलंदाजाशिवाय खेळावे लागेल. येत्या हंगामातील मुंबईचा पहिला सामना २३ मार्च रोजी चेन्नई सुपर किंग्ज विरुद्ध होईल. २९ मार्च रोजी गुजरातचा सामना टायटन्सशी होईल आणि ३१ मार्च रोजी मुंबईचा सामना कोलकाता नाईट रायडर्सशी होईल. या तीन सामन्यांमध्ये बुमराह दिसणार नाही.
जसप्रीत बुमराह तब्बल ‘इतक्या’ सामन्यांना मुकणार –
जर वैद्यकीय पथकाने एप्रिलमध्ये त्याला तंदुरुस्त घोषित केले, तर तो ४ मार्च रोजी लखनौ सुपर जायंट्स विरुद्धचा सामना खेळताना दिसेल. सिडनी येथे ऑस्ट्रेलियाविरुद्धच्या पाचव्या कसोटी सामन्यादरम्यान जसप्रीत बुमराहला पाठीला दुखापत झाली. तेव्हापासून तो संघाबाहेर आहे. दुखापतीमुळे, तो चॅम्पियन्स ट्रॉफीचाही भाग नव्हता, जी भारताने न्यूझीलंडला हरवून तिसऱ्यांदा जिंकली होती.
३१ वर्षीय बुमराहला आयसीसी पुरुष क्रिकेटपटू ऑफ द इयर, आयसीसी पुरुष कसोटी खेळाडू ऑफ द इयर म्हणून घोषित करण्यात आले. त्याचबरोबर आयसीसी पुरुष कसोटी संघ आणि आयसीसी टी२०आय संघ ऑफ द इयरमध्ये त्याचा समावेश करण्यात आला. वर्षाच्या सुरुवातीला ऑस्ट्रेलिया दौऱ्यात झालेल्या पाठीच्या दुखापतीमुळे बुमराहला भारतीय संघातून वगळण्यात आले होते.
